Carmen R. Dacosta reclama unha solución transitoria no mesmo barrio mentres habilitan novas prazas de xestión pública

A Comisión de Política Social aprobou hoxe unha proposición non de Lei presentada polo Grupo Socialista para reclamarlle á Xunta que garanta a continuidade das 41 prazas de educación infantil no barrio das Lagoas logo do peche anunciado da escola infantil “A Casiña”. A parlamentaria socialista presentou esta iniciativa na que emprazan ao goberno galego a buscar unha solución transitoria para resolver a carencia de prazas no barrio.

O Parlamento reclámalle á Xunta que incremente as prazas de escolas infantís de 0 a 3 anos de titularidade e xestión pública en Ourense, e que se dirixa á entidade social que xestiona “A Casiña” para que continúen prestando o servizo a lo menos as familias con fillos xa matriculados. Dacosta presentou esta iniciativa logo de que Cáritas anunciara a finais de febreiro que a finais deste curso ía deixar de xestionar a escola.

O Parlamento pídelle ao goberno galego que busque unha solución transitoria que atenda á carencia de prazas en Ourense, e sinaladamente no barrio das Lagoas, con preferencia para as familias usuarias da Casiña.

A responsable socialista reclamoulle ao goberno galego que garanta unha solución que permita utilizar o mesmo espazo que está a ocupar agora A Casiña para evitar así que as familias queden sen praza ou teñan que se desprazar quilómetros “ata a outra punta da cidade”. Propuxo que estuden a compra ou “calquera fórmula legal” que permita utilizar o mesmo edificio para poñer en marcha unha escola de Educación Infantil de carácter público.

Dacosta advertiu que a cidade ten un déficit de 150 prazas, ás que se van sumar as 41 que integraban este servizo, mentres o goberno galego decidía “devolver 22 millóns de euros de fondos europeos destinados á creación de 3.200 prazas públicas de educación infantil de 0 a 3 anos”. Criticou que “non cren na educación pública”, e acusounos de “marear a perdiz” cando a realidade é que “apostan por privatizar a sanidade e tamén a educación, e o resto é farándula”.

Explicou que a educación nestas idades temperás “non é un luxo, senón unha necesidade” tanto para permitir a conciliación das familias como para garantir a igualdade de oportunidades formativas dos nenos e nenas.

Texto da iniciativa aprobada hoxe:

“O Parlamento insta á Xunta a:

1. Incrementar as prazas de escolas infantís de 0 a 3 anos de titularidade e xestión pública en Ourense.
2. Instar á Xunta de Galicia a que se dirixa á entidade social que xestiona a escola infantil “A Casiña” en Ourense para que continúe prestando o servizo, a lo menos, ás familias con fillos xa matriculados.
3. Para o caso de que non se acade acordo, busque unha solución transitoria que solucione a carencia de prazas en Ourense, e en particular no barrio das Lagoas, con preferencia das persoas usuarias da Casiña”.