Lara Méndez defendeu no pleno do Parlamento unha proposición non de lei para acadar unha xestión sostible do sector a longo prazo, que permita maximizar os beneficios para a poboación local e minimizar os impactos negativos

“O Camiño de Santiago é un gran motor, pero a Xunta non pode centrar nel todos os seus esforzos”, asegura a deputada, que lembrou que o peso do sector na economía galega ascende xa ao 11 % do PIB e do emprego

O Pleno do Parlamento aprobou hoxe por unanimidade a proposición non de Lei do Grupo Socialista para reclamarlle á Xunta un Plan para conciliar o turismo coa calidade de vida da veciñanza. A portavoz de turismo do Grupo Parlamentario Socialista, Lara Méndez, presentou onte esta iniciativa que foi votada e aprobada hoxe.

Méndez defendeu que Galicia debe contar cun Plan turístico integral que faga posible unha xestión sostible do sector a longo prazo. No debate dunha proposición non de lei, a deputada do PSdeG reclamoulle á Xunta unha planificación “ben estruturada” co obxectivo de atraer á comunidade beneficios económicos, pero tamén de compatibilizar o desfrute das persoas que visitan Galicia cunha mellora da calidade de vida das galegas e dos galegos.

Recordou que a pandemia marcou “un punto de inflexión” nos modelos de consumo, tamén no relativo ás viaxes de lecer, con cambios que pasaron de ser conxunturais a converterse en estruturais ao longo dos últimos anos. A preocupación cada vez maior dos turistas polo entorno e o incremento dos desprazamentos de proximidade son novos parámetros que, subliñou a parlamentaria do PSdeG, deben terse en conta á hora de deseñar as políticas públicas no que se refire a un sector estratéxico para a economía galega. De feito, o seu peso tanto no PIB coma no emprego sitúase xa no 11 %, un dato que, ademais, “vai en alza”.

Por ese motivo, o turismo débese ter en conta como un factor clave no desenvolvemento económico de Galicia e incluso “se pode consolidar como un dos principais motores de crecemento” da comunidade. Indicadores como que o 65 % dos turistas prefiren consumir produtos locais durante as vacacións, que o 70 % dos españois aseguran que viaxan máis por España que antes da pandemia ou que o 33 % prefiren facelo pola súa propia comunidade autónoma “débense ter en conta á hora de planificar o desenvolvemento futuro dos recursos”.

Segundo Lara Méndez, eses cambios nos patróns de consumo invitan a reordenar os esforzos da Administración autonómica en materia turística. “O Camiño de Santiago é un gran motor económico, pero a Xunta non pode centrar nel todos os seus esforzos”, dixo para enumerar a variedade de posibilidades que ofrece Galicia, dende o turismo de natureza ata o cultural, pasando polo gastronómico, o enolóxico, o deportivo ou, tamén, o de sol e praia. “Galicia necesita unha planificación turística que teña en conta a súa estrutura económica, social, cultural, natural e humana”, resumiu.

A deputada do PSdeG cualificou de “imprescindible” contar cun plan turístico que aborde de xeito integral o desenvolvemento do sector, xa que “non pode haber un crecemento sostible sen fixar obxectivos e trazar liñas de actuación”, como tampouco sen identificar e priorizar produtos, servizos e destinos turísticos chave.

Ademais, apuntou, esa planificación “debe estar coordinada cos diferentes axentes turísticos, co sector privado e coa sociedade civil”, a fin de “maximizar os beneficios para a poboación local ao tempo que se minimizan os impactos negativos”.

Texto da iniciativa aprobada hoxe:

-“O Parlamento de Galicia insta ao Goberno galego a realizar un plan turístico integral para o noso país, un plan sólido ben estruturado que poida traer múltiples beneficios a Galicia tanto en termos económicos como na mellora da calidade de vida da nosa veciñanza, así como o desfrute das persoas que nos visitan”.