Silvia Longueira reclámalle ao PP e o goberno galego que apoien o uso do galego no Parlamento Europeo

A portavoz de Lingua do Grupo Socialista, Silvia Longueira, subliñou hoxe que os socialistas galegos queren “frear o deterioro da lingua galega pola senda da concordia e do pacto social” logo de 15 anos de “demolición” pola xestión do PP. Longueira presentou unha interpelación no Pleno do Parlamento na que emprazou ao conselleiro de Cultura a “tomar nota” da reclamación masiva e unánime na concentración convocada por Queremos Galego o pasado domingo en Santiago de Compostela.

A responsable socialista reclamoulle ao PP e ao goberno galego que dean pasos de cara a “desandar” a súa xestión dende a chegada de Feijóo e Rueda á Xunta, cando “tiraron por terra todo o que tiñamos feito” a favor do galego. Neste sentido reclamoulle que muden a súa posición e apoien o recoñecemento do galego como lingua oficial no Parlamento Europeo logo de que se negaran ao seu uso no Congreso.

Longueira afeoulle ao conselleiro que o PP votara en contra do recoñecemento do uso do galego no Congreso dos Deputados, que saíu adiante grazas ao impulso do Grupo Socialista, e esixiulle que retiren o seu veto no Europarlamento. Subliñou que a posibilidade de que os parlamentarios poidan expresarse na lingua propia de Galicia fóra das súas fronteiras “non pode ter máis que connotacións beneficiosas”.

Lembrou o primeiro intento da man do Goberno español, que en setembro de 2023 solicitou formalmente á UE que incluíra o galego, o catalán e o euskera como linguas oficiais de pleno dereito, pero se atopou co muro do PP e a ultradereita. Apuntou que “aínda que isto marcaría un fito, a decisión require de unanimidade entre os estados membros e conleva desafíos administrativos e financeiros”.

Esixiulle ao PP e ao goberno galego que traballen polo consenso que dea unha base sólida para “trazar o camiño da restitución” e recuperar o espazo perdido logo dos seus 15 anos de goberno, nos que provocaron unha “case irrecuperable destrución do patrimonio lingüístico do galego”. Así o constata a última enquisa do IGE, que revelan a caída drástica no uso da lingua ata situarse por debaixo do castelán por primeira vez na historia.