Patricia Iglesias acusa ao goberno galego de situarse “no Pleistoceno” pola “excesiva burocracia, pouca flexibilidade e opacidade” administrativa

A portavoz de Transparencia do Grupo Socialista, Patricia Iglesias, alertou hoxe de que a falta de transparencia e axilidade sitúa á administración autonómica “no pleistoceno”. Iglesias presentou unha pregunta oral en Comisión do Parlamento para reclamar a posta en marcha de iniciativas “open data” que garantan a accesibilidade da cidadanía aos datos e informacións da administración pública.

Advertiu que a Xunta “segue a ser unha administración excesivamente burocratizada, pegada ao expediente administrativo, moi pouco flexible e dinámica, opaca, que non logrou ser eficiente na execución de políticas públicas estratéxicas para a cidadanía galega”. Alertou fronte á falta de eficencia e control dos entes instrumentais, a falla dunha gobernanza eficiente na contratación pública e a falla de estratexia na xestión dos proxectos financiados con fondos Next Generation.

Así o demostra, dixo, o informe do Consello de Contas feito público onte mesmo, que sinala que a Xunta concedeu sen concorrencia competitiva un de cada cinco contratos en 2023, e que máis da metade das subvencións se outorgan “a dedo”. Ademais, reclama que someta a control público a actuación das sociedades Impulsa e Recursos de Galicia e tilda de “deficiente” a forma de orzar do Sergas.

Iglesias advirte que a Xunta directamente non avalía as políticas públicas, e reduce a “cosmética” as políticas de integridade, transparencia e de loita contra a corrupción, que son presentadas “só para cumprir formalmente o trámite”. Por iso reclamou que poñan en marcha as ditas iniciativas “open data”, que garantan a accesibilidade aos datos, e a automatización dos procedementos administrativos que permita unha resposta áxil á cidadanía.

Explica que mudando a xestión dos datos para facelos máis accesible garanten servizos horizontais útiles para a cidadanía, a transparencia permite a reutilización dos datos, que serán interoperativos, facilitan iniciativas de análise e avaliación da xestión pública e garanten a ordenación interna da información da administración, promovendo a eficiencia na documentación e clasificación dos datos.