Begoña Rodríguez Rumbo acusa ao goberno galego de agochar os acordos coas empresas beneficiarias

O Parlamento aproba a proposta socialista para que a Xunta dea conta da xestión dos fondos

A portavoz de Facenda do Grupo Socialista, Begoña Rodríguez Rumbo, esixiulle á Xunta planificación, seguimento e transparencia da xestión dos fondos do Plan de Recuperación entregados a Galicia polo goberno central. Rodríguez Rumbo presentou unha pregunta oral no Pleno do Parlamento celebrado hoxe na que acusou ao goberno galego de agochar as formas de acceso ás achegas, os criterios de reparto, as resolucións e a contía prevista inicialmente e a finalmente executada.

A parlamentaria socialista acusou ao goberno galego de “aplicar máis enerxías en confrontar co presidente Sánchez que en xestionar correctamente os fondos recibidos” e emprazou ao goberno galego a dar conta da xestión dos fondos enviados a Galicia por parte do goberno central dentro do Plan de Recuperación.

Lembrou que Galicia foi a quinta Comunidade Autónoma en recibir máis fondos do Estado ata marzo de 2023, cun total de 2.868 millóns de euros. Destas partidas, un total de 1.276 millóns de euros son xestionados directamente polo goberno galego, mentres Galicia participa en 8 dos 12 Pertes postos en marcha, que beneficiaron a 171 proxectos industriais beneficiados con case 200 millóns de euros, e financiará a máis dun centenar de novos proxectos.

Citou o informe de fiscalización realizado polo Consello de Contas, que constata que a xestión da Xunta adoece de “falla de planificación, seguimento, transparencia e de rendición de contas”. Este informe, que analiza os fondos do Plan de Recuperación despregados nos anos 2021 e 22, constata que “mentres a Xunta gastaba esforzos en criticar ao goberno de Pedro Sánchez con calquera escusa, non traballaba para xestionar os fondos co rigor requirido”, dixo.

Advirte que o presidente da Xunta presumía o pasado 23 de febreiro de que Galicia tiña mobilizado o cen por cen dos fondos europeos sen que ata o momento fixera públicos os proxectos que teñen beneficiado.

A parlamentaria socialista contrastou a resposta dos recortes que encabezou o PP en toda Europa na anterior crise financeira coa resposta social á crise da covid e da guerra de Ucraína, que liderou España para despregar un paraugas social que permita “saír a todos e todas xuntos o máis axiña posible sen deixar a ninguén atrás”.

Afeoulle ao PP que a súa resposta teña sido votar en contra de tódalas medidas positivas para a cidadanía, con visitas de Casado, Feijóo e Rueda a Bruxelas para criticar a acción do goberno de España, que provocou o histórico plante da presidenta da Comisión Europea, Ursula Von der Leyen, ao presidente galego na súa última viaxe.

Grazas ás medidas aplicadas polo goberno de Pedro Sánchez, España tense consolidado como a terceira economía da Eurozona co IPC máis baixo, mentres a OCDE aumenta as previsión de crecemento do país para 2023, cun avance que duplicará ao da zona Euro este mesmo ano.

Proposta aprobada

O Pleno do Parlamento aprobou hoxe a proposta socialista, que fora presentada onte, para reclamarlle á Xunta que dea conta da xestión dos fondos enviados a Galicia por parte do goberno central dentro do Plan de Recuperación. A iniciativa foi aprobada, logo de aceptar emendas presentadas polos demais grupos parlamentarios, para reclamarlle á Xunta que lle remita ao Parlamento os informes de seguimento destes fondos.

Texto da iniciativa aprobada hoxe:

-“O Parlamento galego insta á Xunta de Galicia a remitir de forma periódica ao Parlamento os informes de seguimento presentados ao Consello da Xunta respecto dos fondos europeos de recuperación”.