Lara Méndez empraza ao goberno galego a poñer en marcha o Observatorio do Leite e un plan de axudas para garantir unha produción competitiva

A portavoz de Gandería do Grupo Socialista, Lara Méndez, emprazou ao goberno galego a habilitar un “foro de escoita activa” para atender ás problemáticas do sector do leite. Méndez presentou unha pregunta oral en Comisión parlamentaria para reclamarlle ao goberno galego que escoite as propostas dos gandeiros para garantir a supervivencia das explotacións gandeiras de Galicia.

Reclamoulle ao goberno galego que constitúa un punto de encontro periódico e plural seguindo o exemplo da Mesa do Leite que constituíu o Estado, onde “escoiten e materialicen propostas” para garantir a competitividade das explotacións de leite galegas. Urxiu a poñer en marcha unha medida que “non ten custe económico ningún” e que resulta fundamental para a “planificación e activación dun sector tremendamente necesario para o rural e o conxunto da economía galega”.

Pediu ademais un plan de choque con axudas para apoiar unhas explotacións que en demasiadas ocasións vense abocadas a vender a perdas, mentres o goberno galego renuncia a empregar tódolos instrumentos ao seu alcance. Advertiu que os Plans de mellora do goberno galego “non van atender tódalas necesidades”, e desprega unha xestión que fracasa á hora de garantir o relevo xeracional.

Explicou que os mozos e mozas necesitan de garantías para vivir dignamente do seu negocio, e para iso precisan dunha rede de protección fronte ameazas externas como as epidemias que afectan á cabana do vacún. Puxo como exemplo que a falla de axudas do goberno galego para desinfectar establos, instalacións e vehículos fronte á lingua azul impiden unha loita eficaz contra esta enfermidade.

O mesmo sucede con situacións como a deste outono, cando o impacto do furacán Kirk afectou de cheo ás explotacións gandeiras, provocando perdas de produción de entre o setenta e o cen por cen. Advertiu que os gandeiros e gandeiras “non poden comezar cada ano sen saber se ao peche do exercicio van ter beneficios ou terán que pechar”.

A parlamentaria socialista puxo como exemplo o caso da sanidade, onde moi bos profesionais precisan de boas condicións de traballo para que o sistema sanitario manteña a calidade asistencial. Sinalou que “do mesmo xeito, temos un sector gandeiro que se mantén pola vocación e a profesionalidade dos gandeiros, pero cada vez o ten máis difícil polas malas condicións e a falta de escoita por parte do goberno galego”.