Begoña Rodríguez Rumbo censura a “fiscalidade insolidaria” do goberno galego, que defende aos máis ricos mentres lles retira a Tarxeta Básica ás familias que máis o necesitan

7 de abril de 2023. A portavoz de Facenda do Grupo Socialista, Begoña Rodríguez Rumbo, criticou hoxe a “fiscalidade insolidaria” do goberno galego, preocupado de “protexer a calquera costa aos máis ricos mentres castiga ás familias que teñen menos recursos”. Rodríguez Rumbo presentou unha batería de iniciativas parlamentarias para reclamarlle á Xunta que retire o recurso presentado ante o TC contra o imposto ás grandes fortunas.

Rodríguez Rumbo lamenta o recurso presentado polo goberno galego contra un imposto temporal deseñado para gravar ás fortunas de máis de 3 millóns de euros durante os exercicios 22 e 23. Esta decisión vai na liña dos beneficios fiscais que vén de aplicar o goberno galego “para favorecer ás persoas que máis ingresos teñen”, aumentando as bonificacións á cota do imposto sobre o Patrimonio ata o 50 por cento para os patrimonios de máis de 1 millón de euros.

Advertiu que estas decisións coinciden coa retirada da Tarxeta Básica de axudas para produtos de hixiene, supermercado e farmacia a quen máis o necesita. Lembra que este recurso, unido ao paraugas social despregado polo goberno de Pedro Sánchez, evitou que 127.000 persoas estiveran en risco de pobreza en Galicia en 2021, mentres o incremento das bonificacións ao Patrimonio supuxo un “agasallo de 4.500 euros para 7.700 galegos e galegas que máis teñen”.

A parlamentaria socialista sinala que “aquelas persoas que máis teñen deben contribuír un pouco máis en momentos difíciles para dar cumprimento ao mandato constitucional da progresividade na carga impositiva”. Por iso lle reclama á Xunta que “retire o recurso ante o Tribunal Constitucional sobre a Lei que crea o imposto temporal de solidariedade das grandes fortunas -IGP-.