Carmen R. Dacosta acusa ao goberno galego de adelgazar as listas de emprego de forma ficticia

A portavoz de Emprego do Grupo Socialista, Carmen Rodríguez Dacosta, esixiulle ao goberno galego que pare co desmantelamento dos Puntos de Información do Servizo Público de Emprego en máis de cen concellos do rural. Dacosta presentou unha batería de iniciativas parlamentarias para esixirlle á Consellería de Emprego que manteña estes recursos fundamentais para axilizar a renovación da tarxeta de desempregado.

Critica a “enorme irresponsabilidade” amosada polo goberno galego, que na práctica está a dificultar a renovación da prestación do desemprego incumprindo as obrigas que figuran na Lei de Administración Dixital. Esta norma recoñece o dereito de tódolos galegos e galegas a garantir o acceso aos servizos dixitais dende calquera punto, tamén no rural, sen discriminación pola falla de acceso a internet.

Carmen R. Dacosta reclámalle ao goberno galego que manteña en funcionamento estes puntos de información co obxectivo de facilitarlles aos demandantes de emprego a realización dos seus trámites obrigados, así como arranxar aqueles que teñan problemas de funcionamento.

Denuncia que a Consellería de Emprego quere eliminar este recurso logo de case 20 anos de funcionamento logo da súa posta en funcionamento polo goberno do socialista Pérez Touriño. Deste xeito discriminan gravemente ás persoas demandantes de emprego que residen no rural ou teñen dificultades de mobilidade, que estaban obrigadas a desprazarse ata a oficina de emprego asignada para completar calquera trámite.

Adelgazamento ficticio

A responsable socialista sinala que a decisión da Xunta supón un novo chanzo nas súas prácticas contra as persoas desempregadas, “adelgazando de paso as listas de desemprego de Galicia de forma ficticia”. Lembra que esta ofensiva do goberno galego contra a estatística de desemprego comezara en xuño de 2023, cando decidiron eliminar da listaxe a 10.400 desempregadas e desempregados de longa duración.

Con posterioridade, este pasado mes de novembro, anunciaron que obrigarían a rubricar un acordo de actividade aos inscritos como parados no Servizo Público de Emprego de Galicia -SPEG-, borrando das listas de paro a quen non asine. Alertou de que estas iniciativas van “contra as paradas e os parados galegos”, e neste caso concreto supón “comezar a casa polo tellado”.

Explicou que “non se pode realizar este compromiso sen antes actualizar tódolos currículos dos e das demandantes de emprego e realizar a continuación un itinerario personalizado de inserción laboral por parte do orientador”. É nese momento cando a Xunta “ten a obriga de derivar ao desempregado aos cursos adecuados ao seu perfil e que se adecúen ás necesidades do mercado laboral”, unha obriga que o goberno galego “non pode estar máis lonxe de cumprir”.