Carmen R. Dacosta acusa ao goberno galego de discriminar aos 2.500 de nenos e nenas de Valdeorras

A parlamentaria socialista Carmen Rodríguez Dacosta levou ao Parlamento a situación de emerxencia sanitaria do Barco de Valdeorras dende a xubilación este ano do último pediatra especialista que quedaba no Centro de Saúde. Dacosta esixiulle ao conselleiro de Sanidade que garanta como mínimo a cobertura das dúas prazas de Pediatría do centro para atender aos 2.500 nenos e nenas do distrito de Valdeorras.

A responsable socialista sinalou que o desleixo do goberno galego “conculca de maneira flagrante o dereito fundamental á asistencia sanitaria” dos veciños e veciñas do Barco, que están a esixir unha “solución pronta e completa”. Dacosta levou ao Parlamento a demanda da cidadanía de Valdeorras para reclamar unha sanidade “pública, digna e solidaria”, que está a protestar por unha “discriminación inasumible”.

Explicou que o centro chegou a contar con tes prazas de pediatría, e que ata xuño de 2022 contaba con dúas consultas, pero daquela xubilouse un dos pediatras e a praza foi ocupada por unha médica con formación en puericultura. No ano 2023 outra médica trasladábase a Sobradelo, polo que comezaron o ano 2024 cun único pediatra atendendo a tódolos nenos e nenas ata que se xubilou, deixando o servizo cuberto por médicos con formación en puericultura.

Advertiu que esta “non é a única discriminación da comarca” en materia sanitaria, xa que actualmente 16 médicos especialistas do Hospital de Valdeorras esperan polo seu traslado, ademais de que “moitos xa marcharon e os que quedan só permanecerán 3 meses máis” sen que o goberno galego faga “nada” por garantir a continuidade do servizo. Alertou ademais do retraso continuado nos procesos de oposicións polo “desleixo” da Consellería.