Ante a transferencia a Galicia dos fondos estatais para sufragar o programa, Silvia Longueira demandou unha participación equitativa entre ambas administracións

A portavoz socialista de Mocidade reclamoulle ao Goberno galego medidas para garantir que non se poidan vender os parques públicos de vivenda

A portavoz de Mocidade do Grupo Socialista reclamoulle hoxe á Xunta de Galicia que engada fondos propios aos que o Goberno central destina a sufragar o programa de bono alugueiro para a xente nova. Silvia Longueira defendeu, a través dunha proposición non de lei, que a Administración autonómica dea “unha resposta sólida” á demanda existente, xa que na primeira convocatoria das axudas só se atenderon 5.253 solicitudes, fronte ás arredor de 14.000 que se presentaron.

A deputada socialista demandou “unha participación equitativa” entre a comunidade autónoma e o Estado á hora de sufragar un programa ao que, ata o momento, o Goberno de Rueda non achegou nin un só euro. Esa falta de colaboración, que provocou a antedita exclusión de milleiros de mozas mozos, uniuse ademais á demora dun ano na comunicación das denegacións, o que “xerou moita polémica”, recordou.

Longueira cifrou en 526 millóns de euros o investimento en vivenda dentro das políticas impulsadas polos socialistas entre o 2018 e o próximo ano. “O maior investimento da historia”, remarcou, que se vai traducir en Galicia na construción de 1.406 vivendas públicas e na rehabilitación de máis de 18.000.

Precisou tamén que, ao ser a política de vivenda unha competencia autonómica, as achegas son en forma de transferencia do Estado a Galicia. Dos 526 millóns, xa están transferidos o 90 %, a través de dúas vías nas que tamén participan os concellos: os Orzamentos Xerais do Estado, que financian os programas do Plan Estatal de Vivenda 2022-2025 e o bono alugueiro xove, e o Plan de Recuperación, Transformación e Resiliencia, que sufraga os programas de rehabilitación enerxética e de construción de vivenda para alugueiro social.

A Xunta “nunca di” que os fondos proceden do Estado ou do Plan de Recuperación

A Xunta “nunca o di ou pono pequeniño para que pareza que é unha colaboración tipo ‘comisión de fiestas’”, criticou Silvia Longueira sobre a escasa ou mesmo nula publicidade que o Goberno galego fai da procedencia dos fondos.

Ademais das cuestións económicas, a deputada socialista sinalou a importancia de que a vivenda pública manteña esa condición. Por ese motivo, instou á Xunta a habilitar as medidas necesarias para “asegurar que non se poderán allear os bens patrimoniais integrantes dos parques públicos de vivenda”, coa excepción de que esas vendas se produzan en favor de outras administracións, os seus entes instrumentais ou persoas xurídicas sen ánimo de lucro que teñan entre os seus fins a xestión de vivenda con fins sociais.

A proposición non de lei que defendeu a deputada socialista hoxe incluía tamén, respecto do bono alugueiro, requerir do Goberno galego un listado con todas as solicitudes que quedaron sen resolver dentro do plan estatal de acceso á vivenda 2022-2025, un informe sobre a falta de xestión dese plan por parte da Xunta e que se habilite un mecanismo axeitado para restituír nos seus dereitos a todos os solicitantes que puidesen verse afectados pola deficiente xestión da axuda.