Paloma Castro denunciou que arredor de 40.000 nenos e nenas galegos están sen servizo de pediatría en atención primaria, “un problema de primeira orde en máis de 200 concellos”

“En Castro, Cospeito e Outeiro claman por un pediatra para os case mil pequenos que atende persoal médico sen formación especializada; en Negueira de Muñiz, A Fonsagrada, Baleira e Castroverde levan máis de dous meses sen pediatra, e en zonas como A Terra Chá, A Mariña, Lalín, Betanzos, o Grove, Verín, Ribadeo, Arzúa ou Fornelos parchéase con puericultores”, denunciou a deputada do PSdeG

O Grupo Socialista vén de esixir no Parlamento de Galicia que se cubra a totalidade das prazas de pediatría no centro de saúde de San Roque, en Vilagarcía de Arousa, e que se cumpra así co seu plan funcional, que establece catro profesionais na quenda de mañá e un na de tarde. Paloma Castro defendeu hoxe na Comisión de Sanidade, Política Social e Emprego unha proposición non de lei en cuxa exposición de motivos se lembra que, na actualidade, unha das prazas permanece vacante, mentres que na quenda de mañá un dos profesionais que atenden o servizo “tense que desprazar con moita frecuencia ao punto de atención continuada”.

A deputada do PSdeG sinalou a urxencia de dotar o centro de saúde do persoal necesario “para que dous pediatras non asuman o traballo de catro” e que a atención pediátrica “se faga baixo os parámetros de eficiencia e calidade”, algo que a día de hoxe “non se está a dar”. “E que non me veña o PP co descurso de sempre, de que ningún neno queda sen ser atendido”, advertiu Castro para sinalar a importancia de que a prestación do servizo se realice en condicións óptimas e non en precario, con profesionais que deben atender ao dobre de pacientes e familias que cada vez que acoden ao centro de saúde atopan un novo médico ou médica, coas dificultades que implican para o seguimento eses continuos traslados.

Paloma Castro advertiu tamén de que a situación non está afectando só aos usuarios e usuarias dos servizos de prediatría, senón que a sobrecarga de traballo produce unha situación de estrés entre os propios profesionais.

Segundo recordou, as queixas levan tempo sucedéndose, con concentracións e reclamacións escritas á Consellería de Sanidade. Tamén o goberno local de Vilagarcía se dirixiu á Xunta para chamar a atención sobre o problema, “pero sen obter ningunha resposta”, reprochou. 

A parlamentaria socialista reprochoulle á Xunta que o problema de Vilagarcía, “que está a causar un grave prexuízo a moitos pais, nais, nenas e nenos que sufren a mingua na calidade da atención sanitaria”, reprodúcese en toda Galicia, porque é “un problema de primeira orde en máis de 200 concellos”.

“En Castro, Cospeito e Outeiro claman por un pediatra para os case mil pequenos que atende persoal médico sen formación especializada; en Negueira de Muñiz, A Fonsagrada, Baleira e Castroverde levan máis de dous meses sen pediatra, e en zonas como A Terra Chá, A Mariña, Lalín, Betanzos, o Grove, Verín, Ribadeo, Arzúa ou Fornelos parchéase con puericultores”, denunciou a deputada do PSdeG, que repasou varios exemplos dun problema que afecta a toda Galicia. Cos gobernos do PP “perdéronse 84 pediatras e desposuíuse deste servizo a 88 municipos”. Así, a situación é “especialmente crítica” nas áreas rurais, onde hai “arredor de 40.000 nenas e nenos sen pediatra en atención primaria”, afirmou en base aos datos da Asociación Española de Pediatría.