Paloma Castro censura a negativa do PP a actualizar o catálogo de especies ameazadas, aprobar e desenvolver plans de recuperación e incrementar o territorio protexido

Lembra que a “xestión negacionista” do goberno galego levou a que Galicia sexa “un dos territorios de España que menos aposta pola conservación e protección da biodiversidade”

A portavoz de Medio Ambiente do Grupo Socialista, Paloma Castro, criticou hoxe que a Xunta leva “15 anos sen protexer ás preto de 200 especies en risco que viven en Galicia”. Así o dixo no debate dunha proposta na Comisión de Medio Ambiente para esixirlle á Xunta que incremente a protección destas especies, que foi rexeitada polo PP.

A parlamentaria socialista pedíalle á Xunta que amplíe o catálogo de especies ameazadas, que aprobe os plans de recuperación que están pendentes de desenvolver e que amplíen o territorio das Áreas Clave para a Biodiversidade.

A responsable socialista criticou a “xestión negacionista do cambio climático e nula conciencia medioambiental” do goberno galego, que “non vai máis alá do ecopostureo, co que non dan nin unha mala palabra, pero nin unha boa acción a favor da protección do ecosistema”. Como resultado desta xestión, lembrou que Galicia é na actualidade “un dos territorios de España que menos aposta pola conservación ou protección da súa biodiversidade”.

Advertiu que só 4 das 200 especies que compoñen o catálogo de especies ameazadas, do Colexio Oficial de Biólogos contan cun plan de xestión aprobado e en vigor. Sinala que a falla de desenvolvemento dos plans provocou que Galicia quedara atrás na protección das especies, deixando á maioría delas “sen protección fronte ás actividades e intereses ilexítimos”.

Alerta de que 15 anos de “inacción” por parte do goberno, que vai “no sentido contrario á conservación das especies”, provocando “a case desaparición” de moitas delas, facendo caso omiso de tódalas ferramentas legais e das súas competencias e responsabilidades coa conservación da biodiversidade galega.

Esixiulle ao goberno galego que retome a liña marcada polo goberno presidido polo socialista Emilio Pérez Touriño, que en 2007 aprobou o Catálogo galego de especies ameazadas, que require de plans de xestión adaptados, coas conseguintes accións de protección e plans de vixilancia para avaliar a súa eficacia. Sen embargo, criticou que o goberno galego deixou esmorecer estas iniciativas, e na actualidade as súas actuacións son practicamente inexistentes.