Patricia Iglesias critica a “hipocrisía” do portavoz do PP no Concello, que hoxe votou en contra da proposta para esixir o compromiso da Xunta

A portavoz de Industria do Grupo Socialista, Patricia Iglesias, acusou hoxe ao goberno galego de discriminar á comarca de Bergantiños ao negarse a axilizar e comprometer datas para a ampliación do Polígono de Bértoa -Carballo-. A responsable socialista presentou unha iniciativa neste sentido na Comisión de Industria do Parlamento que foi rexeitada polo PP.

Iglesias sinalou a “hipocrisía” do portavoz do PP en Carballo, que hoxe defendeu como deputado no Parlamento o voto en contra do seu partido. Sinalou a diferenza no seu sentido do voto entre o Concello e o Parlamento, como fixo coa ampliación da AG-55, que no Concello apoiou e no Parlamento rexeitou, ou cando votou en Santiago contra a ampliación do persoal docente para necesidades especiais e un novo orientador no colexio de Bergantiños e no Concello abstíñase.

A responsable socialista salientou que, segundo os anuncios da directora xeral de Estratexia e Solo Industrial, e seguindo os mellores prognósticos, a ampliación do Polígono tería lugar nun prazo mínimo de 5 anos. Mentres tanto, dixo, a comarca vai perder crecemento industrial e empregos cualificados, xa que nestes momentos non queda chan dispoñible polo desleixo do goberno galego.

Sinalou que os contratos para a redacción dos proxectos para a expropiación de terreos no Polígono por parte do IGVS -que figuran na plataforma de contratos da Xunta- levan paralizados dende hai un ano e catro meses cando se trata de “expedientes de contratación ordinarios”.

Reclamoulle ao goberno galego que se comprometa de forma “firme e sen condicionamentos” a axilizar a ampliación do Polígono de Bértoa, unha necesidade reivindicada polos propietarios do Polígono e a propia Confederación de Empresarios de Galicia. Sinala que con esta iniciativa a comarca “gaña en competitividade industrial, empregos cualificados e mellor remunerados e calidade de vida e benestar par Bergantiños e a Costa da Morte.