Lara Méndez sinala que a “alianza vergoñenta” para recortar o número de preguntas ao presidente constitúe unha “mostra de autoritarismo e falla de respecto polas regras do xogo democrático” que “non ten precedentes na historia recente do noso Parlamento”

A viceportavoz do Grupo Socialista, Lara Méndez, denunciou hoxe publicamente a “alianza vergoñenta de PP e BNG” para tratar de silenciar ao PSdeG no Parlamento a través dunha “violación clara dos principios de calidade democrática”. Méndez criticou a “pinza” de populares e nacionalistas para recortarlle aos socialistas unha pregunta ao presidente en cada período de sesións.

A responsable socialista denunciou a “manipulación evidente dos procedementos parlamentarios” para quitarlle aos socialistas unha das preguntas ao presidente a través da “escusa” de cedérllela ao Grupo Mixto. Méndez apoiou que o Grupo Mixto dispoña da oportunidade de formular preguntas ao presidente, pero non a costa de que esta sexa “recortada dos dereitos do PSdeG”, e engadiu que “non vamos consentir que nos poñan un burka para silenciarnos”.

O Grupo Socialista, explicou, fai esta denuncia logo de  intentara resolver a cuestión “pola vía do diálogo” e logo de manifestar o seu rexeitamento ao comezo do anterior período de sesións e na Mesa e Xunta de Portavoces de onte mesmo. Sen embargo foi imposible porque PP e BNG “aproveitaron para impoñer unha decisión que atenta contra o dereito á representación de tódolos galegos e galegas que depositaron a súa confianza no PSdeG”.

Por iso presentarán un escrito dirixido á Mesa do Parlamento para corrixir e reconducir pola vía do consenso o que é unha “manipulación evidente dos principios parlamentarios”, e que resulta “inxusta para o PSdeG e para todos aqueles que cren nunha democracia plena e participativa”, tal e como dixo a representante socialista.

Méndez denunciou a “pinza” de PP e BNG para “cercenar os dereitos do PSdeG” a través dun subterfuxio que busca “reducir a nosa capacidade de control sobre o goberno” e que ademais supón un “precedente perigoso para a democracia” en Galicia. Lamentou esta “mostra de autoritarismo e de falla de respecto polas regras do xogo democrático” co obxectivo de limitar a capacidade dos socialistas para facer oposición e limitar a transparencia e a rendición de contas do goberno.

Decisión sen precedentes

Lara Méndez explicou que esta decisión “non ten precedentes na historia recente do Parlamento de Galicia”, e lembrou que na Lexislatura 2016-2020 os tres grupos da oposición plenamente constituídos dispuxeron de cadansúa pregunta ao presidente en tódolos plenos ordinarios da Lexislatura, incluíndo o BNG, que daquela tiña 6 representantes na Cámara, menos dos que ten hoxe o PSdeG.

Sinalou que na anterior Lexislatura os dous grupos da oposición tiveron sempre o mesmo número de preguntas ao presidente e dúas proposicións non de Lei como mínimo, “incorporando criterios de proporcionalidade nas interpelacións e preguntas ao goberno, que aceptamos con total naturalidade”.