Julio Abalde responsabiliza ao goberno galego da caída de galegofalantes, que sitúa á lingua nunha “situación límite”

Desbota as “escusas e triquiñuelas metodolóxicas” do PP para xustificar unha “caída histórica” nos galegofalantes

O parlamentario socialista Julio Abalde criticou hoxe o “desprezo pola lingua” amosado polo goberno galego durante os últimos 15 anos ten provocado a caída drástica de galegofalantes que vén de sinalar o último informe do IGE. O responsable socialista interveu durante a comparecencia do secretario xeral de Lingua no Parlamento, a quen lle advertiu que “as políticas galegofóbicas da Xunta avergoñarían ata a Fraga”.

Alertou de que a posición do PP contraria ao uso do galego chega incluso a tentar de impedir o seu uso no Congreso e no Senado. Mentres na Cámara Baixa é posible utilizar a lingua con normalidade grazas á iniciativa do secretario xeral do PSdeG, José Ramón Gómez Besteiro, esta contou co voto en contra do PP.

Acusou ao PP de empregar o galego “como arma política”, dende 2009, co que conseguiron o “descrédito e a desvalorización social” do galego, derivando no descenso do seu uso e “volver ao franquismo”, onde era considerada como unha “lingua de segunda”. Esixiulles que “tomen a decisión clara de traballar por e para o consenso” na toma de medidas para prestixiar o galego a través de apoio, axuda e medidas políticas”.

Abalde esixiulle ao goberno galego un “cambio de rumbo” na xestión da lingua, que vén de recibir unha “emenda á totalidade” co informe do IGE, que constata que por primeira vez o uso do castelán supera ao do galego nesta Comunidade Autónoma. Advertiu que mentres outros gobernos “toman medidas” para protexer ás linguas, en Galicia “desatenden os sinais de alarma”, mentres a súa única resposta é “a pasividade e o desinterese”.

Esixiulle ao secretario xeral que “asuma a súa responsabilidade” por uns resultados catastróficos para a lingua, logo de 15 anos de políticas “que desprezan ao noso idioma” e están a concibir unha “verdadeira traxedia cultural”, como consecuencia de “decisións políticas concretas que ignoran á nosa lingua”. Concluíu que “é un claro reflexo da obsesión do PP por presentar unha Galicia onde o galego quede relegado a unha anécdota”.

Triquiñuelas

Desbotou as “escusas” e “triquiñuelas metodolóxiccas” do PP e do goberno galego para esquivar a súa responsabilidade dunha “caída histórica” no uso do galego, sinalando á chegada de inmigrantes ou ao uso das novas tecnoloxías. Lembrou que “en Cataluña a mocidade tamén utiliza as novas tecnoloxías, pero a Generalitat aposta decididamente por integrar o catalán nelas, e por iso non sofren a mesma perda de identidade”.

Afeoulle ao goberno galego que “non faga nada para garantir que o galego teña espazo neste mundo dixital”, e emprazou ao goberno galego a “reflexionar seriamente diante da caída do uso do galego nas escolas, nos fogares e nos medios sociais”. Alertou de que “se non toman medidas urxentes, corremos o risco de ver como a nosa lingua, elemento fundamental da nosa identidade, segue camiño da desaparición”.