Begoña Rodríguez Rumbo defende un modelo fiscal progresivo para que aporte máis quen máis ten e censura que a Xunta rebaixe o imposto de Patrimonio aos ricos mentres retiran a tarxeta básica

A portavoz de Facenda do Grupo Socialista, Begoña Rodríguez Rumbo, criticou hoxe o modelo fiscal do goberno galego, polo que “mentres rebaixan impostos aos máis ricos, non teñen vergonza en quitarlle aos máis pobres”. Presentou unha interpelación no Pleno do Parlamento na que criticou a rebaixa dun 50 por cento do imposto do Patrimonio a 7.700 grandes fortunas mentres suprimen a Tarxeta Básica a 55.000 familias.

A responsable socialista contrastou os dous modelos fiscais, entre o do PP que “defende ás persoas de ben” -ironizando coa expresión de Feijóo para referirse aos máis ricos- e o modelo socialista que defende “aos máis vulnerables e ás clases medias e traballadoras”. Explicou que mentres o PP deixaba de ingresar 35 millóns de euros pola redución do imposto do Patrimonio, o paraugas social do Estado evitaba que 120.000 galegos e galegas caeran na pobreza en 2021.

Explicou que a redución do Patrimonio supuxo un “agasallo de 4.500 euros de media aos 7.700 galegos e galegas que máis teñen”, mentres as pretendidas rebaixas do IRPF para as economías máis humildes traduciuse na rebaixa de “apenas 12 euros” ao ano para as familias menos puidentes. Preguntou se “consideran suficiente a rebaixa para reverter as eivas da sanidade ou para comezar o curso escolar con material cada vez máis caro”.

Reivindicou un modelo de redistribución da riqueza para camiñar cara unha sociedade “máis igualitaria e xusta”, cuns servizos públicos “de calidade e ao alcance de todos e todas, que favorezan aos máis vulnerables, impedindo a exclusión social”. Chamou a “reverter a precariedade e o desmantelamento” da sanidade e a educación logo de 14 anos e goberno de Feijóo e Rueda á fronte da Xunta.

Rodríguez Rumbo defendeu uns servizos públicos “universais e de calidade” que permitan afrontar a “situación de vulnerabilidade que están a padecer moitas familias na Comunidade Autónoma”, cun sistema impositivo que “grave a quen máis ten, e non trate igual a quen é diferente” a nivel impositivo.