Carmen R. Dacosta denuncia que o secretario xeral de Emprego usa a comparecencia sobre o programa de axudas a autónomos para falar dos datos do paro ou “tódolos programas habidos e por haber”

A portavoz de Emprego do Grupo Socialista, Carmen Rodríguez Dacosta, acusou hoxe ao goberno galego de “tomarlle o pelo” ao Parlamento ao pedir comparecencias en Comisión para despois “falar de calquera cousa” allea á mesma e “facer propaganda”. Así o dixo na comparecencia do secretario xeral de Emprego supostamente para tratar o Programa de axudas a autónomos e despois falar dos datos do paro -non autónomo- e de “tódolos programas habidos e por haber”.

A responsable socialista afeoulle que empregara a intervención para ofrecer datos sesgados do emprego en febreiro, obviando a suba do desemprego nos menores de 25 anos, do esforzo inversor da Consellería no ano 2020, da mesa de Emprego Autónomo e demais asuntos á marxe do programa de axudas á contratación indefinida ou formación de asalariados.

Dacosta criticou a falla dunha aposta real do goberno galego polo emprego autónomo, ata o punto que Galicia é a segunda Comunidade Autónoma do Estado que máis autónomos perde en termos absolutos, só superada por Castela e León. Reclamoulle á Consellería de Emprego que lidere a posta en marcha dun Plan Integral para autónomos e autónomas que implique a todo o goberno galego de forma transversal.

Urxiu á necesidade dunha diagnose precisa da situación destes profesionais que representan o 20 por cento da ocupación de Galicia “sen que ata o momento tomaran medidas integrais e consensuadas”. Advertiu que o “goteo de peches de negocios deixa case 7.000 locais baleiros en Galicia”, cun impacto directo na actividade tanto no rural como nas contornas urbanas.

Reclamou un Plan de Relevo Xeracional e o apoio a medidas básicas como a redución da xornada laboral tamén neste sector, que “vai mellorar a vida do traballador e a situación das empresas”, incrementando a produtividade e a eficiencia de forma considerable. Reclamou finalmente unha liña de axudas directas de ata 6.000 euros para aquelas empresas de 5 empregados ou menos.