Carlos López Font lamenta que o goberno galego persista na “vitimización” fronte ao Estado que bonifica as peaxes da AP9 mentres eles manteñen as peaxes das autoestradas autonómicas

O portavoz de Infraestruturas do Grupo Socialista, Carlos López Font, acusou hoxe ao goberno galego de artellar un “sainete” para evitar dar conta dos 300 millóns de euros que pagaron polo rescate de 4 autovías polas que os galegos e galegas non pagaban un euro de peaxes. Así o dixo na comparecencia do director da Axencia Galega de Infraestruturas hoxe no Parlamento.

O responsable socialista afeoulle que levaran hoxe ao Parlamento o pago de 18 millóns de euros que ten reclamado o Estado para cumprir coa sentenza xudicial sobre o rescate das peaxes Vigo – O Morrazo e A Barcala. Advertiu que seguen sen dar conta dos 300 millóns de euros ás empresas que xestionaban as autovías de O Salnés, Barbanza, Ourense – Celanova e Santiago – Brión.

Explicou que a sentenza deriva do acordo asinado en 2006 entre o Estado, a Xunta e Audasa para que os gobernos central e autonómico asumiran o 50 por cento das peaxes en sombra, que derivou na reclamación de máis fondos por parte da empresa polo aumento do tráfico.

Esta situación derivou nun Real Decreto aprobado en 2017 polo goberno de Rajoy para que o goberno asumira o cen por cen do custe, que foi anulado pola xustiza e por iso agora o Estado reclama 18 millóns dos pagos que se produciron dende 2020.

López Font acusou ao goberno galego de empregar un argumento xurídico técnico “farragoso” como escusa para unha “nova vitimización” do goberno galego que, subliñou, “debe defender á administración”, pero lle afeou que estean “máis que dispostos a poñerlle deberes aos demais” mentres eles mesmos “escorren o vulto”.

Lembrou neste sentido que os galegos e galegas levan dende 2006 sen pagar as peaxes nos contornos de Vigo e A Coruña grazas a gobernos socialistas cando Pérez Touriño era o presidente da Xunta de Galicia, pero o goberno do PP leva 16 anos sen ter levantado as peaxes das autoestradas autonómicas AG – 55 A Coruña – Carballo e AG – 57 do Val Miñor.