Elena Espinosa esíxelle a Xunta que “remate con esta opacidade” e que non agarden nin un día máis para presentar os Orzamentos ante o Parlamento

Subliña que “non aceptamos que xoguen coa transparencia e coa responsabilidade que teñen para coas galegas e galegos, especialmente nun asunto tan crucial como o futuro económico e social do noso país”

A portavoz de Orzamentos do Grupo Socialista, Elena Espinosa, trasladou hoxe “a nosa indignación e profunda preocupación pola falta de transparencia coa que o goberno da Xunta está a tratar a aprobación dos Orzamentos para o próximo ano”. Advertiu que “a día de hoxe, os representantes do pobo galego non podemos facer unha valoración real e completa das contas públicas máis alá dos poucos datos sesgados que a Xunta quere facer públicos a través de notas de prensa”.

Engadiu que é “unha auténtica vergoña” que a información sobre os Orzamentos nos chegue “por fascículos”, a través dos medios de comunicación, só daquilo que o goberno considera “vendible”. Unha estratexia que demostra, unha vez máis, a utilización das contas públicas en beneficio propio, tratando de vender “fume” aos cidadáns.

Preguntou “como é posible que, sendo esta Cámara a que ten a responsabilidade de debater e aprobar os Orzamentos, teñamos que esperar ata o sábado para ter acceso á información completa?”. Explica que “este retraso é unha falta de respecto inaceptable aos representantes da cidadanía, que deberiamos dispoñer de todos os datos para poder facer un exame serio e rigoroso das contas públicas”.

Os socialistas galegos esíxenlle ao goberno da Xunta “que remate con esta opacidade e que non agarden nin un día máis para presentar os Orzamentos ante o Parlamento”. Espinosa engade que “non aceptamos que xoguen coa transparencia e coa responsabilidade que teñen para coas galegas e galegos, especialmente nun asunto tan crucial como o futuro económico e social do noso país”.

“Agardamos que a Xunta abandone esta actitude de desprezo institucional e actúe coa seriedade que a situación require, dando acceso inmediato aos Orzamentos e garantindo un debate aberto e honesto”, remachou.