Insta ao goberno galego a que exista un informe de impacto ambiental favorable ao proxecto que acompañe á modificación do plan de restauración da explotación mineira

A parlamentaria socialista Noa Díaz vén de rexistrar unha batería de iniciativas no Parlamento de Galicia nas que se lle reclama á Xunta que non autorice a instalación dun novo vertedoiro no lugar de Miramontes, en Santiago, sen que exista un informe de impacto ambiental favorable.

A parlamentaria compostelá alerta de que se está tratando de sacar adiante esta iniciativa tan só cunha modificación do plan de restauración, o que está servindo como vía para ampliar os usos da explotación mineira converténdoa nun vertedoiro “pola porta de atrás”.

Por iso, na liña do manifestado polo Concello de Santiago nunha declaración institucional en 2019 e, máis recentemente, nunha proposta aprobada por maioría a instancias do PSdeG, Noa Díaz reclámalle á Xunta que extreme as garantías medioambientais en Miramontes e que non permita a instalación dun novo vertedoiro sen que exista ese informe de impacto ambiental favorable.

Esta necesidade faise aínda máis patente tendo en conta que “esta instalación leva sendo un foco de conflito permanente coa veciñanza da zona polos múltiples impactos ambientais que xera na zona como fedores, lixiviados, contaminación de regatos, verteduras incontroladas ou tráfico intenso de camións”.

Na súa iniciativa, Noa Díaz explica que no novo plan proponse o recheo dos ocos da explotación mineira con materiais naturais escavados e con áridos reciclados procedentes de plantas de valorización externas á explotación, así como a utilización de tecnosolos. Deste xeito, renúnciase á fabricación de áridos reciclados dentro da explotación, tal e como se pretendía no anterior plan de restauración, pero mantendo os outros parámetros do proxecto.

“Precisamente”, subliña Noa Díaz, “esa renuncia serve como xustificación, segundo os redactores do proxecto, para que non sexa necesario someter ese plan a un novo procedemento de avaliación ambiental”. Trátase dunha pretensión que, para a deputada socialista, resulta “alarmante”.

Nesta liña sinala que baixo a nomenclatura ‘plan de restauración’, este tipo de actuacións “contribúen ao incremento dos efectos medioambientais adversos que se están a producir, neste caso concreto na zona de A Grixoa, coas instalacións xa permitidas”. De aí derívase “contaminación do aire e malos cheiros ou un elevado tráfico de camións pesados coa conseguinte contaminación por fumes e ruídos”. Tamén advirte “dun elevado risco para a seguridade viaria, e potencial contaminación das augas subterráneas”.

A maiores, Noa Díaz alerta tamén de que os plans de vixilancia ambiental desas instalacións “detectaron incumprimentos na explotación e na planta de tecnosolos” ata o punto de que derivaron na incoación de procedementos sancionadores por parte da Consellería de Economía, Empresa e Innovación.