O candidato do PSdeG ao Parlamento Europeo mantén un encontro en Barbanza para analizar a situación das rías de Arousa e Noia fronte a un goberno galego que “non fai absolutamente nada”

O candidato do PSdeG ao Parlamento Europeo, Nicolás González Casares, denunciou hoxe o desleixo da Xunta diante da drástica caída da produción marisqueira nas rías galegas. O responsable socialista mantivo unha xuntanza en Boiro para analizar a situación concreta das rías de Arousa e Noia, onde criticou que “a Xunta non quere saber nada do que está ocorrendo” e acusou ao executivo autonómico de renunciar a propoñer respostas.

“A Xunta non fixo absolutamente nada”, subliñou antes de lembrar que a Comisión Europea ten recoñecido que durante os cinco anos que durou a Lexislatura o goberno galego non presentou ningún tipo de iniciativa nin pediu financiamento para realizar ningún tipo de estudo ou investigación para saber o que estaba ocorrendo.

Explicou que polo contrario, os socialistas europeos, da man do propio González Casares, se puxeron en contacto coa dirección xeral do Mar da Comisión Europea e o Centro de Desenvolvemento Tecnolóxico e Industrial -CDTI- do Ministerio de Ciencia para poñer en marcha un programa de investigación con cargo a fondos europeos que explique as causas da caída da produción en Arousa.

Anunciou que os socialistas galegos seguirán traballando dende Europa cos axentes da ría para ter un “diagnóstico claro” das causas da elevada mortalidade dos bivalvos, que no caso da ría de Muros – Noia foi do 77 por cento en especies coma o berberecho. Advertiu que dende que o PP goberna na Xunta, o número de afiliados ao réxime do mar caeu un 21,3 por cento, con 5.266 traballadores menos, e as licencias de marisqueo a pé reducíronse un 17,6 por cento.

Execución orzamentaria

González Casares esixiulle ao goberno galego que “utilice todo o que Europa pon nas nosas mans” para dinamizar o sector do mar en Galicia logo de afearlle que deixara sen executar o 60 por cento dos fondos do Fondo Marítimo Pesqueiro a disposición de Galicia no último período.

Anunciou que o novo programa deste Fondo para Acuicultura Galicia recibirá máis de 350 millóns de euros, o 40 por cento do total asignado ás comunidades autónomas. Sinalou que “non nos podemos permitir que os fondos sexan devoltos sen facer ningún ben nas nosas rías” nun momento difícil agravado polo “abandono” da Xunta.

Comprometeuse así a continuar na liña de traballo dos socialistas europeos para seguir conseguindo fondos para poñelos a disposición da Comunidade Autónoma e “tratar de saber o que sucede nas rías, fronte a unha Xunta que non fai nada por amañar esta situación”.