O portavoz de Agricultura e Gandería do Grupo Socialista, Martín Seco, esixiulle a Medio Rural que “se poñan a traballar e fagan algo” en apoio ao sector agrario galego. Así o dixo na comparecencia do titular desta Consellería, hoxe no Parlamento de Galicia, para dar conta da situación do sector fronte á crise logo de que, como sinalou Seco “non saíra publicado no DOG nin un só euro propio en axuda aos nosos produtores”.

O responsable socialista afeoulle ao conselleiro que “en vez de utilizar o DOG para o noso sector agrario dende as súas responsabilidades de goberno, prefiren aproveitar o seu tempo para ir a Madrid a poñerse ao pé dunha pancarta”. Por moito que a reivindicación dos gandeiros galegos sexa “xusta”, dixo, a Consellería presentouse “intentando lavar a súa mala conciencia por ser incapaces” de desbloquear axudas para un sector en crise.

Lembrou que a Xunta conta con competencias exclusivas en materia de Medio Rural, que o responsable do departamento utiliza para alertar da “desaparición do sector gandeiro”, pero “sen poñer enriba da mesa nin unha soa medida do goberno galego para axudar ao sector agrario”. Lamentou que “todo un goberno se amosa como unha simple entidade financeira, que o único que pode aportar ao sector gandeiro é avalar préstamos e pagar os intereses de adiantos da PAC”.

Mentres, o sector da carne afronta unha crise estrutural “derivada da falla absoluta de políticas públicas que guiasen aos nosos sectores produtivos durante décadas”, e “cando chega unha tormenta, todo o noso sector vense abaixo”.

E mentres “negáronse a utilizar o máximo permitido do PDR para axudar ás explotacións de carne, bloquearon durante meses o observatorio de prezos, e negáronse a impulsar contratos homologados con prezos estipulados” e renunciaron durante unha década a transformar o sector do leite para darlle valor engadido.

Esixiulle ao goberno galego que “se poñan a traballar e fagan algo por tomar medidas económicas de apoio aos sectores produtivos, aumenten a base territorial, garantan o cumprimento da Lei da Cadea Alimentaria, e impulsen os nosos produtos de gran calidade para mellorar a balanza alimentaria” porque “sinxelamente, o sector agrario non pode agardar”.