Marina Ortega reclama máis persoal para as residencias de maiores e máis inspectores da Xunta que garantan as condicións do servizo
A portavoz de Política Social do Grupo Socialista, Marina Ortega, esixiulle hoxe á Xunta que incremente o persoal e mellore as condicións laborais nas residencias de maiores de Galicia, ademais de incrementar o número de inspectores da Consellería. Ortega presentou unha pregunta oral en Comisión logo do incendio da noite do pasado 28 de decembro na DomusVi Barreiro de Vigo.
A responsable socialista reclamoulle á Xunta que garanta as condicións de seguridade nestas instalacións en vistas a posibles situacións de emerxencia. Reclama que tomen o suceso de Vigo como chamada de atención, logo que nesta ocasión a rápida actuación dos bombeiros permitira impedir problemas máis graves que a evacuación de varias decenas de residentes, sinaladamente despois de sinalar que na quenda había apenas 4 traballadoras para atender a 150 residentes.
Ortega reclamoulle ao goberno galego que aumente o persoal destas instalacións e mellore as súas condicións, por canto “repercute directamente nunha mellor atención e no benestar das persoas maiores”, reducindo as ratios de residentes por traballador. Ademais, engade, considera “importantísimo incrementar os técnicos de inspección” dependentes da Consellería de Política Social.
Inspeccións
A parlamentaria socialista explica que o incremento no número de prazas residenciais privadas rexistrado en Galicia nos últimos dez anos foi acompañado da baixada no número de inspeccións “como aconteceu ata o último ano”. Advertiu de que Galicia “é a segunda Comunidade Autónoma de toda España con menos técnicos de inspección para supervisar as residencias de maiores”, que son competencia da Xunta, por moito que “lles sexa fácil botar balóns fora e sinalar ao Estado”.
Reclamoulle ao goberno galego que garanta as condicións de seguridade nestas instalacións “en tódalas quendas”, xa que, como quedou demostrado, “durante a noite pódense dar incidentes que precisen dunha actuación inmediata”. Alertou ademais de que Política Social ten unha responsabilidade directa sobre o que sucede na residencia DomusVi Barreiro, onde “deben ser conscientes de que houbo moitos problemas, e que continúan actualmente”.
