A portavoz de Xustiza do Grupo Socialista, Patricia Vilán, presentou unha pregunta oral na Comisión de Xustiza celebrada hoxe no Parlamento na que acusou á Xunta de “absoluta imprevisión e mala praxis” no coidado dos cidadáns legos en dereito que participaron no xuízo do “crime da rozadora”. Vilán afeoulle á Xunta que “estes cidadáns non tiveran nin auga, nin comida decente, nin habitacións dispoñibles ao saír do xuízo”.

A responsable socialista advertiu das “lamentables condicións” ás que estaban sometidos estes cidadáns xurados que “tiveron que estar dous días enteiros deliberando incomunicados para poder chegar a un veredicto”. Sinalou que a Dirección Xeral de Xustiza non dotou dos medios básicos a uns cidadáns legos en dereito que “sufriron a falta de auga durante o xuízo, a falta de comida decente, cea e habitacións dispoñibles ao saír dos xulgados”.

Vilán reclamou que “pola falta de previsión da Dirección Xeral de Xustiza estes cidadáns tiveran que saír da súa situación de incomunicación escoltados pola policía nacional para poder ir cear a unha bocatería”. Advertiu que estes cidadáns “tiveron que pedir unas pizzas na Audiencia para poder comer” a pesar, sinalou, de que esta Dirección “coñece que vai haber sorteo de xurados dous ou tres meses antes da celebración do xuízo”.

A deputada socialista sinalou que “foi o persoal adscrito á Sección 2ª da Audiencia Provincial de Pontevedra o encargado de facer velar os dereitos destes cidadáns” e acusou de “total desentendemento” á Dirección Xeral de Xustiza que é a encargada de xestionar estes trámites dende que Feijóo está no Goberno. Sinalou a “vergoña que lle ten que supoñer ao Goberno que unha das persoas do xurado presentara unha queixa ante o TSXG pola mala xestión que houbo”.

Vilán acusou ao goberno galego de “eludir as súas responsabilidades” e reclamoulles que “nomeen un responsable de xestionar todos os trámites relacionados coa intendencia dos cidadáns xurados que participan nos xuízos con Xurado Popular nas Audiencias Provinciais das catro provincias galegas e as seccións das mesmas nas cidades de Vigo e Santiago de Compostela”.