Urxe ao presidente da Xunta que se reúna co secretario xeral do PSdeG para “deseñar de forma corresponsable e seria as medidas que se deben poñer en marcha” 

O voceiro parlamentario do PSdeG, Luís Álvarez, preguntará a Feijóo no Pleno polas medidas que vai poñer en marcha a Xunta para facer fronte á situación económica derivada da guerra en Ucraína. Anunciouno, hoxe, trala Xunta de Portavoces onde enumerou os asuntos que levará o PSdeG na xornada plenaria da vindeira semana.

Neste marco, o dirixente socialista apuntou que as consecuencias “tan graves” que están vivindo os sectores estratéxicos derivados do conflito internacional “requiren dunha resposta coordinada e complementada dende o ámbito da Xunta” e máis cando, ata o de agora, “a única resposta que se está a dar por parte do presidente da Xunta é que as responsabilidades están no ámbito da Unión Europea e do goberno o Estado, como se a Xunta carecese de competencias en ningún ámbito en concreto para os sectores estratéxicos” como pesca, transporte ou gandaría.

Ante isto, destacou o socialista, o secretario xeral do PSdeG, Valentín González Formoso, “vén de remitir unha carta ao presidente da Xunta para manter unha reunión e deseñar de forma corresponsable e seria as medidas que se deben poñer en marcha” ante unha “situación preocupante e dramática” e que “ten as súas repercusións en todos os ámbitos da sociedade”.

O PERSOAL DAS RESIDENCIAS DE MAIORES

Noutro orde de cousas, o PSdeG levará á Cámara unha interpelación para abordar as “polémicas” que existen dentro das residencias de maiores cando “hai unha folga convocada por parte das empresas non están a cubrir os cadros de persoal que teñen concertados coa administración”. “É posible que a estas empresas lles saia máis rendible asumir as sancións económicas que poderían impoñérselles –por incumprir os concertos–, en lugar de cubrir os cadros de persoal”, alertou.

Ademais, incidiu, “queremos saber se a Xunta ten detectado que se estea a contratar a persoal sen titulación necesaria, medida que foi permitida con carácter de urxencia durante a pandemia, pero que é posible que nalgunha residencia, por parte dalgunha empresa, se estea a utilizar esa excepcionalidade con carácter ordinario”.

No eido educativo, o PSdeG abordará de novo no Pleno, a través dunha proposición non de lei, a “decisión unilateral” da Consellería de Educación de pechar un colexio con máis de trinta alumnas e alumnos para crear “hipoteticamente” un conservatorio profesional de música no Concello de Begonte.

A POLÍTICA DE VIVIENDA DA XUNTA: “PARTICULARMENTE LAXA, CANDO NON ABSOLUTAMENTE INACTIVA”

Ademais, Álvarez avanzou que o PSdeG porá o foco tamén na “particularmente laxa, cando non absolutamente inactiva”, política de vivenda da Xunta e pedirá que se convoque, de xeito inmediato, o programa de vivenda estatal para a mocidade galega que reside en concellos de menos de 20.000 habitantes; así como que se desenvolvan medidas complementarias ao xa existente bono social eléctrico.

En canto a igualdade, o Grupo Socialista levará a pleno unha moción para coñecer a situación do plan galego de conciliación e corresponsabilidade 2018-2021. Como segunda moción e no eido de medio ambiente, o PSdeG abordará o aumento de verteduras ás rías galegas.

AS FRAGATAS F-110 DE FERROL E O ASTALEIRO BARRERAS

No ámbito industrial, o PSdeG realizará unha pregunta urxente sobre o “inminente” comezo da construción das fragatas F-110 en Ferrol que supón “o maior contrato da historia do Ministerio de Defensa en Ferrol”, así como unha pregunta oral ao goberno sobre as previsións con respecto ás ofertas presentadas polas empresas que optan á compra do estaleiro Barreras.

Por último, no eido das infraestruturas, o Grupo levará como segunda pregunta oral a execución da conexión do eixo de comunicación A-52 na fronteira con Portugal.