Acusa ao goberno galego de obrigar aos alcaldes e alcaldesas a “mendigar” recursos cando lles debe ata 700 millóns de euros para financiar competencias que lle corresponden á administración autonómica

A viceportavoz do Grupo Socialista, Lara Méndez, reclamoulle hoxe ao goberno galego que incremente o financiamento destinado aos concellos a través do Fondo de Cooperación Local con criterios obxectivos de reparto. Méndez presentou unha moción no Pleno do Parlamento para incrementar a autonomía financeira dos concellos, pero que foi rexeitada polo voto en contra do PP.

A responsable socialista lembrou que a Xunta obriga aos concellos a asumir cada ano entre 600 e 700 millóns de euros de gastos que segundo o informe da Fegamp corresponden ás competencias impropias delegadas que lle corresponden á administración autonómica, pero que lles obriga a asumir sen incrementar o financiamento.

A responsable socialista explicou que o goberno galego obriga aos concellos a asumir custes por exemplo das escolas infantís, os comedores escolares, o mantemento dos colexios e os centros de saúde, as políticas de emprego, a limpeza das faixas de protección forestal, a retirada de niños de velutina ou o Servizo de Atención ao Fogar.

Advertiu que os alcaldes e alcaldesas “non son mendigos de recursos, senón servidores do público” e reclamoulle á Xunta que acorde coa Fegamp o incremento do financiamento local a través do Fondo de Cooperación Local “con criterios obxectivos de reparto” e que rematen co reparto discrecional de recursos só a concellos afíns.

Acusou ao goberno galego de “recadar impostos utilizando aos concellos como intermediarios”, obrigándoos a recadar o canon de Sogama ou da auga mentres lles retira recursos. Criticou neste sentido que o goberno galego recade a totalidade do canon de Sogama, imposto por Bruxelas como castigo por incinerar e enterrar residuos, e anuncien unha bonificación do 60 por cento pero agochando que se quedan co 40 por cento restante.

No caso do canon da auga, mentres os concellos lle entregan ao goberno galego a totalidade do que lles recadan aos cidadáns, a Xunta reverte os ingresos de maneira discrecional e arbitraria, de forma que concellos como o de Lugo entregou 12 millóns en 9 anos, dos que non recibiu de volta nin un só euro.

Defendeu o proxecto “tremendamente municipalista” dos socialistas galegos, que, engadiu, “cremos na administración local como transformadora das sociedades e garante da mellora da vida dos cidadáns”. Apuntou que “a cidadanía así o ve, e por iso gobernamos á maioría dos galegos e galegas a través dos concellos”.