pídelle ao goberno galego que reverta o desmantelamento das oficinas agrarias comarcais e comece a reforzalas para apoiar aos propietarios de explotacións no rural

A portavoz de Medio Rural do Grupo Socialista, Lara Méndez, emprazou hoxe á Xunta a “deixar de poñerlle trabas” aos agricultores e gandeiros galegos e comece a “camiñar ao seu carón” para unha “transición tranquila” ao dixital. Méndez presentou unha proposta na Comisión de Agricultura para apoiar a dixitalización das explotacións rurais e reforzar as oficinas agrarias comarcais para facilitar os trámites administrativos.

A responsable socialista criticou o desmantelamento das 67 oficinas agrarias que hoxe están dedicadas case en exclusiva a tramitar plans de mellora, aplicar correccións sobre a PAC ou facendo mostraxes sanitarias. Reclamoulle ao goberno galego que reforce os recursos materiais e o persoal que traballa nelas para que recuperen as súas funcións de apoio técnico aos produtores galegos.

Criticou que a Xunta só se preocupe das infraestruturas, esquecendo que “teñen que dotalos de persoal e de máis recursos”, e comparou a situación destas oficinas cos centros de saúde ou as escolas que “constrúen, pero logo non hai médicos ou non hai profesores”. Afeoulles que teñan recortado un 18 por cento o investimento en equipamentos para o rural, que supón 6 millóns de euros menos cos que entorpecen a actualización das explotacións.

Ademais, sinalou que o goberno galego “nin fai nin permite que se faga” o asesoramento aos titulares de explotacións tampouco dende as asociacións ou organizacións profesionais, xa que ten reducido o programa de fomento do asociacionismo no rural un 37,5 por cento nos orzamentos do goberno galego.

Explicou que a tramitación presencial necesariamente ten que convivir coa telemática mentres  non haxa cobertura nin recursos dixitais para todo o rural, e o goberno galego ten a responsabilidade de “garantir unha transición ordenada e sen prexuízo para o administrado”.

Méndez reclamoulle á Consellería do Medio Rural que pola en marcha unha liña de axudas para a compra de equipos informáticos no rural, nomeadamente ás explotacións gandeiras e agrícolas, e que poña en marcha cursos de formación para que aprendan a utilizar estes recursos. Tamén reclamou que habiliten o rexistro presencial de documentación nas oficinas agrarias, e que estas conten de equipos informáticos a disposición dos interesados con apoio dos funcionarios.

Finalmente, propuxo transferirlle recursos ás organizacións profesionais agrarias que están a asumir o traballo que deixa de facer a administración autonómica “polo seu desleixo e por ese paulatino desmantelamento das oficinas agrarias comarcais”.