Lara Méndez denuncia no Parlamento que o novo banco de xermoplasma de Mabegondo está desocupado porque a Xunta non o dota de equipamento
Besteiro insta á Xunta a negociar a transferencia aos concellos dos terreos portuarios sen uso, e denuncia o abuso de seguir cobrando por eles
18/10/2024
O Parlamento aproba a nosa proposta para reclamarlle á Xunta que lle remita ao Ministerio o proxecto para desbloquear a limpeza das canles da Lagoa de Antela, que xa leva 3 anos de retraso
18/10/2024
Critica os “anuncios, anuncios e anuncios, pero de medios nada”, e augura que os orzamentos de Medio Rural previstos para 2025 serán “outro brinde ao sol”
A portavoz de Agricultura e Gandaría do Grupo Socialista, Lara Méndez, denunciou no Parlamento que o novo banco de xermoplasma do Centro de Investigacións Agrarias de Mabegondo continúa desocupado porque a Xunta no o quere dotar de medios. Así o dixo logo de que o PP votara en contra dunha proposición non de Lei do Grupo Socialista para reclamarlle que doten ás instalacións do equipamento que necesitan.
A parlamentaria socialista lembra que o dito banco leva previsto e anunciado dende o ano 2014, hai 10 anos, pero ata o momento só finalizaron dous dos cinco módulos dos que consta, e ademais os tres rematados “están sen equipar a pesares de contar con orzamento”. Aludiu así a que a Consellería do Medio Rural deixou sen executar as partidas previstas nos orzamentos de 2024, polo que “moito nos tememos que 2025 vai ser outro brinde ao sol do PP”.
Méndez lembrou que o propio conselleiro do Medio Rural, vulnerando a norma, viaxou en xaneiro ata Mabegondo, en pleno período preelectoral, para anunciar un equipamento que a día de hoxe seguen sen enviar. Por este motivo, “o banco de xermoplasma está onde estaba ata agora, porque falta toda a equipación e non poden facer o traslado”, o que evidencia a “falta de interese” do goberno galego.
Lamentou que a “aposta polo rural” do goberno galego “queda en palabras e anuncios, e o que pasa entre anuncio e anuncio é o tempo perdido para os galegos e galegas”, como consecuencia da falla de servizos e de dotación do rural, ao que están aplicando “a morte inducida”.
A responsable socialista comezou a súa intervención afeándolle ao goberno galego o seu “desleixo, opacidade e falta de respecto” polo Parlamento, xa que, explicou, na resposta á pregunta escrita sobre o banco de xermoplasma achegaron o enlace á pregunta oral nunha sesión da Comisión de Agricultura da que aquela mesma pregunta fora aprazada, polo que non contaba con nada de información.
