Julio Torrado considera que a queixa do PP de Arousa, incluso a pedida de dimisión da Conselleira, é “un lavado de cara” tras tres anos apoiando a posición do goberno

4 de abril de 2023. O parlamentario do grupo socialista Julio Torrado, reprochou á Xunta que creara un problema no sector da mexilla e do percebe, logran enfadar a todos os afectados, incluídos aos populares de Arousa que pediron a dimisión da Conselleira nun “lavado de cara” ante as eleccións municipais.

Na comisión 8ª de Pesca e Marisqueo, o deputado arousán preguntou ao director xeral de Marisqueo, Antonio Basanta, polo conflito existente co sector da mexilla que levan tres anos reclamando ao goberno galego que retire o decreto que limita a súa extracción, cunha maior magnitude das súas protestas nos últimos meses.

Julio Torrado trouxo de novo esta problemática á cámara ante falla de solucións por parte dun goberno que “creou o conflito” e agora cre que “váiselle das mans”. Comparou ao executivo do PP cos “malos árbitros”, xa que “non deixan contento a ninguén” ao enfadar neste caso ao sector, á xente que vive do sector sen traballar nel e aos do seu propio partido, afirmou.

Esta última referencia ven polas declaracións dos voceiros do PP na comarca de Arousa reclamando que se retire o decreto e se cese aos responsables, sendo o propio Basanta e a Conselleira do Mar os principais sinalados. O deputado socialista e secretario xeral da agrupación socialista de Vilagarcía de Arousa entende esta actitude dos populares como un intento de “lavado de cara” a dous meses das eleccións municipais.

O socialista argumentou que nestes tres anos dende a aprobación do decreto votaron en bastantes ocasións os deputados populares da zona a favor deste decreto e as medidas que contén. “Non hai auga suficiente para lavar a cara do PP neste asunto”, alegou Torrado.

Do mesmo xeito, Torrado amosou ao director xeral actitude construtiva, “ao contrario que os do seu partido”, porque afirma que aos socialistas “interésanos que resolvan o conflito”. Para iso reclamoulle que “xa está ben de facer con isto un xogo” e que aporten algunha solución para evitar que esmorezan “dous símbolos das nosas costas como son a mexilla e o percebe”, asegurou.

Julio Torrado igualmente propuxo ao representante do goberno que cambien a súa forma de actuar e comecen a traballar con datos actualizados despois de que se utilicen informes de hai máis dunha década, de xeito que os técnicos propios da Xunta sexan os que recollen datos e elaboren informes e que participen os dous sectores nas decisións por diálogo e consenso.

Despois de que Basanta non respondera ao asunto polo que foi preguntado, Julio Torrado advertiulle de que o feito de que non se queira pronunciar sobre o conflito da mexilla “é bastante revelador”.