Pide unha compensación xusta para os propietarios que teñen as súas terras dentro do parque e que levan décadas vendo mermadas as súas parcelas

O parlamentario socialista Julio Abalde pediulle hoxe á Xunta que acorde cos propietarios as terras nas que se estende o Parque Natural das Fragas do Eume e que aínda están nas mans de particulares que levan décadas vendo como se reduce o seu patrimonio. Abalde presentou unha pregunta oral no Pleno do Parlamento para presentar a demanda destes particulares que, dixo, “teñen dereito a compensacións”.

O parlamentario socialista reclamoulle ao goberno galego que acorde unha valoración máis alá das entre 3.000 e 7.000 euros por hectárea que está a ofrecer para adquirir 125 hectáreas dun parque que ten unha superficie de 3.000 hectáreas. Pediulle á Xunta que abra un proceso de diálogo para “conseguir que este espazo único en Galicia e en Europa sexa protexido adecuadamente”.

Sinalou que neste momento o 90 por cento da superficie deste espazo está nas mans de pequenos propietarios, que “non rexeitan a declaración de Parque Natural, pero que entenden que teñen dereito a compensacións e indemnizacións xustas”.

Explicou que “sería perfectamente asumible para o Goberno de Galicia un programa de adquisición de terras” que xa está presupostado no Plan Reitor de Usos e Xestión do Parque publicado en 2023, cun retraso de 26 anos dende a creación do parque.