Julio Abalde acusa ao PP de “utilizar” aos estudantes galegos como “reféns da estratexia de confrontación política sen mirar as consecuencias”

O portavoz de Educación do Grupo Socialista, Julio Abalde, esixiulle hoxe á Xunta que se poña do lado dos estudantes galegos e “rompa coa disciplina” do PP de Madrid, que na súa “obsesión de empregar calquera escusa na confrontación total”  desta volta pretenden boicotear a nova Proba de Acceso á Universidade -PAU-. Abalde lamentou que o PP e o goberno galego se presten a empregar aos rapaces galegos como “reféns dunha estratexia de enfrontamento sen mirar polas consecuencias”.

Criticou que o PP galego “se preste” a seguir a liña marcada para abandonar o consenso educativo poñendo en perigo aos estudantes nun camiño sen final. Responde así ao anuncio do PP de fixar unha proba única solo para as súas comunidades, “unha nova ocorrencia” inviable, inxusta e inoperativa para o sistema educativo galego, que vai ter aos alumnos “estudando unha cousa e sendo examinados doutra diferente”.

Lémbralle ao PP que Galicia é unha Comunidade Autónoma “con lingua e cultura propias”, polo que “non é de recibo que a Xunta renuncie ás súas competencias par apoñerse ao servizo partidista do PP sen pensar no prexuízo que lles pode ocasionar aos seus estudantes”.

Explica que a PAU é froito da colaboración entre o Ministerio, as autonomías, os docentes, as universidades e os estudantes, nun esforzo de coordinación no que o PP non quixo participar, abandonando os grupos de traballo e prohibíndolle ás comunidades autónomas gobernadas por aquel partido participaran na proba piloto. Advirte que a súa falla de interese polo acordo vai agravar as diferenzas entre as comunidades autónomas, rompendo co sistema de oferta universitaria.

Aféalles que teñan presentado unha proposta “inviable e fóra de tempo” cando a PAU ten sido xa aprobada e está en marcha coa única intención de crear unha “polémica artificial e baleira de contido”. Alertou fronte á intención de “resucitar” á Lomce, que se ten demostrado como “un fracaso absoluto xa moi superada pola realidade”.

O responsable socialista lembra que a normativa é escrupulosa coa lexislación, e advirte que o propio Tribunal Constitucional ten ditaminado, mediante Sentencia 207/2012 do 14 de novembro que é ao Goberno a quen lle corresponde o deseño dunha proba con estrutura e parámetros comúns. Iso non supón en ningún caso establecer unha identidade absoluta nos contidos da proba, xa que a concreción lles corresponde ás comunidades autónomas.