O líder do PSdeG urxe ao goberno galego a fortalecer a educación pública, tras manter unha xuntanza coa alcaldesa Verónica Tourón

O secretario xeral do PSdeG, Gonzalo Caballero, mantivo hoxe unha xuntanza coa alcaldesa de Salceda de Caselas, Verónica Tourón, para abordar as necesidades da veciñanza do municipio.

“Feijóo nos deixa un país sen futuro”, alertou o máximo dirixente das e dos socialistas galegos logo de lamentar o “abandono” da Xunta aos concellos pequenos “que quedan sen servizos públicos e non reciben investimentos” por parte do goberno galego, o que “deixa claro o seu antimunicipalismo”.

Nesta liña, o líder do PSdeG censurou tamén a “inacción” do goberno galego ante o “problema estrutural” ao que a Xunta abocou á Atención Primaria cando en Salceda e nos concellos da contorna “hai listas de espera no centro de saúde de ata dúas semanas”. “Non podemos consentilo”, sentenciou.

FORTALECER A EDUCACIÓN PÚBLICA

Doutra banda, Gonzalo Caballero urxiu á Xunta a fortalecer a educación pública no concello coa ampliación do IES Pedras Rubias, a creación dunha nova escola de educación primaria, así como a creación dunha escola infantil “que garanta plenamente o dereito das nenas e nenos de Salceda a recibir unha educación pública digna e de calidade”.

“Todos os galegos e galegas temos que ter os mesmos dereitos independentemente de onde vivamos”, concluíu o dirixente socialista.