O candidato socialista ao Parlamento Europeo e o secretario xeral do PSdeG, José Ramón Gómez Besteiro, reiteran na sede dos armadores de Vigo a súa oferta ao resto de grupos de formar fronte común para que haxa un comisario específico de Pesca

O secretario xeral do PSdeG, José Ramón Gómez Besteiro, e o candidato socialista ao Parlamento Europeo Nicolás González Casares reiteraron hoxe tras unha reunión coa Cooperativa de Armadores de Pesca do Porto de Vigo (ARVI) o seu ofrecemento de facer fronte común cos demáis grupos políticos co obxectivo de que a Comisión Europea conte cun responsable específico de Pesca.

O aspirante a renovar o seu escano nas eleccións do vindeiro domingo mostrouse moi crítico co papel que xogou o comisario Sinkevičius, “que non foi un amigo da pesca galega” e xerou moitas tensións. Para González Casares, é necesario loitar “da man” e facer forza conxuntamente dentro das familias políticas europeas co fin de dar cumprimento a “unha necesidade que se percibe cada día máis”.

“Imos defender a pesca como piar social e como piar económico, como tamén defendemos o piar medioambiental”, asegurou o candidato, que aclarou que non se pode poñer ningún deses aspectos por enriba dos outros, ao contrario do que fixo o responsable de Medio Ambiente, Océanos e Pesca da Comisión.

“Os socialistas imos estar na defensa da pesca, do mar e de todo o que supón” para Galicia, prometeu Nicolás González Casares.

José Ramón Gómez Besteiro incluíu ese pacto pola pesca no marco dun gran acordo político xunto á transición enerxética e a xestión dos fondos europeos. Desde Galicia, “debemos apostar por levar unha posición unida ao Parlamento Europeo”, propuxo.

O secretario xeral mostrou a súa preocupación polo ascenso da ultraderita en Europa e alertou de que o auxe dos nacionalismos excluíntes tamén pode ter efectos prexudiciais sobre o sector pesqueiro.

A preguntas dos medios, reiterou a idoneidade de González Casares para o cargo de portavoz do Comité de Pesca. “Vou defender esa posibilidade porque é importante para Galicia e para España”, asegurou.

Pola súa banda, o presidente de ARVI, Javier Touza, destacou os beneficios de dispoñer dun interlocutor en Bruxelas como o eurodeputado socialista, que facilitou, dixo, “unha continua comunicación co Parlamento Europeo.

Touza tamén se mostrou de acordo na reivindicación dun comisario europeo dedicado exclusivamente á pesca, aínda que ve axeitado que poida asumir tamén competencias en materia de promoción alimentaria. O presidente dos armadores de pesca vigueses cualificou de “esencial” actualizar a política pesqueira, coa introdución de “elementos dende o punto de vista social e económico”, entre eles, mellorar as oportunidades para que a xente nova poida dar o tan necesario relevo xeracional no sector.