O eurodeputado socialista valorou en Redondela a chegada de financiamento da UE para avanzar na transición ecolóxica, “eses fondos de recuperación que o Goberno socialista pon en Galicia e que o PP tratou de parar en Europa”

Visitou xunto á alcaldesa, Digna Rivas, a praza de Ponteareas, reurbanizada ao abeiro da EDUSI e un exemplo “do que acontece en moitas vilas grazas a que o Goberno distribúe os recursos sen distinguir cores políticas, ao contrario do que fai a Xunta”

Santiago, 29 de maio. O candidato do PSdeG ao Parlamento Europeo Nicolás González Casares sinalou hoxe en Redondela que nas eleccións do vindeiro 9 de xuño elíxese “entre a polarización á que nos levan a dereita e a ultraderita e unha Europa de paz e convivencia, de investimentos para as persoas, como a que propugnamos os socialistas”.

O eurodeputado e a alcaldesa, Digna Rivas, visitaron a praza de Ponteareas, recentemente renovada grazas aos fondos procedentes da Estratexia de Desenvolvemento Urbano Sostible e Integrado (EDUSI). Esta actuación, que, entre outros aspectos, serviu para mellorar a mobilidade e a seguridade viaria nese ámbito urbano, é a máis representativa dunha serie de intervencións por valor de máis de 5 millóns de euros que serviron para transformar diferentes espazos do municipio redondelán. 

González Casares púxoa como exemplo “do que acontece en moitas vilas grazas a que o Goberno distribúe os fondos sen distinción de cores políticas, mentres que a Xunta fai todo o contrario”, pero tamén “do bo facer da alcaldesa”, que conseguiu que a cidadanía volva gozar dun espazo que “está dando moitísima vida” á zona.

Fronte á creación de “espazos de paz e de convivencia coma estas rehabilitacións”, o candidato socialista a renovar o escano no Europarlamento criticou o achegamento do PP á ultradereita, que queda de manifesto no silencio dos populares ante a “vergoña” da reunión de Abascal con Netanyahu “o mesmo día que España recoñece o Estado palestino”.

A preguntas dos medios, destacou que “cada semana, case cada día” chegan a Galicia fondos europeos “para descarbonizar a economía e avanzar na transición ecolóxica”. “Eses son os fondos de recuperación que o Goberno socialista pon en Galicia e que o PP tratou de parar en Europa”, lembrou.

Digna Rivas afondou na importancia do apoio da UE á hora de acometer proxectos coma a renovación da praza. “Grazas a eses fondos europeos estamos a transformar tamén as parroquias e todo o concello”, sinalou.