Nota de prensa

GONZÁLEZ CASARES DEFENDE EN AMES O PACTO VERDE EUROPEO FRONTE A UNHA DEREITA E UNHA ULTRADEREITA QUE “ATACAN A CALIDADE DE VIDA”

O candidato socialista lamentou que a Xunta non aproveite axeitadamente os fondos europeos para desenvolver proxectos de mellora do medio ambiente

O alcalde, Blas García, explicou que Ames leva esperando dende o 2012 que a Xunta cumpra a promesa de ampliar a depuradora para atallar a contaminación no río Sar

O candidato do PSdeG a revalidar o seu escano no Europarlamento, Nicolás González Casares, defendeu hoxe en Ames o Pacto Verde Europeo fronte a unha dereita e unha ultradereita que atacan as iniciativas políticas para a transición ecolóxica, co que tamén “atacan a calidade de vida” da cidadanía. González Casares reuniuse co alcalde, Blas García, coincidindo co Día do Medio Ambiente e xuntos comprobaron o estado do río Sar ao seu paso polo municipio.

O candidato socialista criticou que a Xunta desaproveite fondos europeos destinados á mellora do medio ambiente, algo no que coincidiu o rexedor, que recordou que no 2012 a Xunta “anunciou a ampliación da depuradora”, unha actuación que segue sen desenvolverse 12 anos despois.

González Casares puxo Ames como exemplo de avance en iniciativas tan importantes como lograr enerxías máis asequibles favorecendo as comunidades enerxéticas, e insistiu en que os socialistas “cremos no Pacto Verde non só porque contribúa á loita contra o cambio climático, senón tamén porque mellora as condicións de vida da xente”.

Blas García asegurou que o seu Concello “ten experiencia na recepción de fondos europeos” e demandou “cando menos un proxecto” para a ampliación da estación de tratamento de augas a partir do que poder “colaborar coa Xunta en buscar financiamento”.

García explicou que un dos obxectivos da visita de Nicolás González Casares era “que vise a situación do Sar, que puidese comprobar o estado de contaminación no que se atopa” tras as promesas que a Xunta “nunca cumpriu”. Confiou, porén, en que a depuradora que se vai construír en Santiago “grazas aos fondos europeos” axude a depurar o río ata a EDAR de Sisalde, “que está sobrepasada pola chegada de residuos”.

“Unha vez que estea en Europa, seguro que Nico nos vai axudar a ampliar a depuradora”, dixo o rexedor de Ames.