O portavoz de Gandaría do Grupo Socialista, José Manuel Pérez Seco, criticou a falla de políticas activas do Goberno galego para mellorar a situación da muller no rural. Así o dixo no debate dunha pregunta oral en Comisión na que criticou que o presidente da Xunta “falla clamorosamente ao seu compromiso tanto co rural como coa igualdade da muller”.

Sinalou que no medio da que Feijóo deu en chamar a Lexislatura do Rural, e logo do seu compromiso repentino coa igualdade, logo das protestas sociais da semana pasada, sinalou que “a muller do rural atópase infrarrepresentada, fora dos espazos de toma de decisións, invisibilizada e con máis dificultades para o acceso ao mercado laboral en comparación cos homes”.

Os socialistas galegos reivindican a intervención do goberno galego á hora de preservar as condicións de vida no medio rural, que necesita urxentemente políticas activas para “o mantemento da poboación activa, dinámica e próspera”, sinaladamente para amparar o papel da muller. Estas intervencións, dixo, resultan “esenciais para a fixación da poboación, conservación do medio ambiente e relevo xeracional”.

Artesáns Galegos da Carne

Ademáis, reclamoulle hoxe ao goberno galego que se implique para “protexer, apoiar e defender” aos gandeiros galegos afectados pola crise de Artesáns Galegos da Carne. O responsable socialista levou hoxe a Comisión parlamentaria a situación desta industria, vendida en novembro logo de non poder resolver a súa crise.

Pérez Seco explicou que a entidade foi adquirida a finais do ano pasado pola empresa catalá Suministros Megaro Foods por 1,6 millóns de euros, que non chegan para asumir os 6 millóns de débeda total que asume. Agora, dixo, “está por ver se esa empresa compradora estaría disposta a facerse cargo dos impagos arrastrados, o que é algo canto menos difícil”.

Reclamou a intervención da Xunta para axudar aos gandeiros a título individual que non cobraron, o que permitiría mitigar os custes e danos asociados aos impagos. Explicou que hai ganderías con débedas de 5.000 euros e superiores, e un grande número de gandeiros “que non pertencen a ningunha das cooperativas que forman parte da sociedade, que venderon a súa carne á empresa e non recibiron nada a cambio”.

Artesáns Galegos da Carne, explicou, estaba liderada por Carcosa, S.A., unha firma coruñesa especializada na comercialización e distribución que tiña arredor do 70 por cento da sala de despezamento. O outro socio destacado era a cooperativa de segundo grao Artesáns Gandeiros, que aglutinaba a 4.000 produtores e englobando á súa vez a unha decena de cooperativas de base.

A crise, xestada nos últimos anos, comezou retrasando os pagos a Artesáns Gandeiros, que comercializaban a maior parte do seu gando a través desta empresa, e continuou suprimindo precisamente esta comercialización de gando para rematar coa venda da industria á emrpesa catalá.