O secretario xeral do PSdeG sinala que “evidencia que Galicia non é prioridade para Feijóo e abre un “escenario de incompatibilidade” en contra dos intereses desta Comunidade Autónoma

O secretario xeral do PSdeG, Valentín González Formoso, sinalou hoxe que a decisión de Feijóo de optar á presidencia do PP nacional, abrindo a vía do seu abandono da Xunta, constitúe un “engano á cidadanía galega”. Sinala que a formalización do anuncio por parte do polo momento presidente da Xunta, “evidencia que Galicia non é prioridade para Feijóo”.

O líder dos socialistas galegos sinalou que “hai apenas un ano tivemos un proceso electoral no país no que a prioridade e o lema electoral de Feijóo era Galicia, Galicia, Galicia, e hoxe a realidade é que opta polo Partido Popular, Partido Popular, Partido Popular”.

Explicou que a cidadanía “aspira a votar a un presidente para 4 anos, e non para apenas un ano”, o que definiu como “un engano electoral”, e advertiu que “ningunha estratexia electoral de ningún partido debe de prevalecer”. Sen embargo, advertiu, a decisión do PP provoca un “escenario complexo en Galicia no momento no que aflorarán incompatibilidades máis pronto que tarde”.

González Formoso sinalou varios exemplos destas incompatibilidades, preguntándolle a Feijóo se vai defender os intereses de Galicia cando o presidente de Andalucía reclame para Cádiz a fabricación das fragatas de Navantia. O mesmo sucede co financiamento autonómico, “cando teña que escoller entre a dispersión de poboación de Galicia ou primar a acumulación de poboación do Mediterráneo”.

Algo semellante sucede coas cotas pesqueiras, entre os intereses atlánticos ou mediterráneos, ou a posición no reparto das axudas da Política Agraria Común, entre as grandes extensións ou as explotacións máis contidas características de Galicia. Feijóo deberá tamén escoller, dixo, entre defender a localización da planta de baterías en Galicia ou en Cataluña.

O responsable socialista acusou a Feijóo de abocar a Galicia a unha situación de “incompatibilidade tan real que nunca se dera, agás no caso de Aznar como presidente de Castela e León”, quen no seu momento “deixara a presidencia da Comunidade Autónoma de forma inmediata”.

Son apenas un puñado de exemplos que “evidencian a necesidade urxente de resolver” o escenario, unha responsabilidade que descansa exclusivamente en “quen xera esta situación, e quen ten a capacidade de aplicar os mecanismos legais, estatutarios e institucionais para resolvela”, que é o PPdeG.

Sempre preparados

En resposta ás preguntas dos xornalistas, González Formoso asegurou que os socialistas galegos “sempre estamos preparados” para afrontar calquera proceso electoral logo de rematar o proceso congresual. Este permitiu, dixo, “arrincar un proxecto ilusionante, que representa un socialismo integrador e moderno, para unha Galicia que soñe, pense, que investigue, solidaria e con ansia de mellorar e de crecer” e de desenvolver as súas potencialidades e o talento no seu territorio”.

Un proxecto, continuou, preparado para “pasar páxina” dos gobernos do PP, que deixan “un país máis pequeno, con menos poboación, máis endebedado, co máis parados e paradas que cando chegou Feijóo”. Unha Galicia na que “o talento cada vez se retén menos, se investiga menos e que mes a mes ve o Índice de Produción Industrial á cola do Estado”.