Formoso reivindica ao PSdeG como a “única forza que concilia o sentido común” coa capacidade de “xerar ilusión” con proxectos de futuro
Besteiro contrasta a execución “máis rápida e eficiente” dos proxectos con fondos europeos por parte dos concellos fronte ao “retraso importante” da Xunta
11/05/2023
O Grupo Socialista esíxelle á Xunta “máxima transparencia e igualdade” nas axudas ás festas de interese turístico
12/05/2023
O secretario xeral do PSdeG, xunto co alcalde Bugallo e o ministro Miñones, participa na tradicional pegada de carteis coa que se inicia a campaña en Santiago
Destacou que o seu partido estará centrado nos próximos catro anos en facer cidades “máis amables, que creen emprego para reter o talento e que garantan o acceso á vivenda”
11 de maio de 2023. O secretario xeral do PSdeG, Valentín G. Formoso, participou a noite deste xoves na tradicional pegada de carteis, celebrada na praza de Mazarelos, en Santiago, onde reivindicou ao Partido Socialista como a “única forza capaz de conciliar o sentido común” á fronte dos gobernos municipais coa capacidade de “xerar ilusión” en torno á concepción de novos proxectos de futuro pensados para as persoas.
Nun acto no que estivo acompañado polo alcalde e candidato á reelección en Santiago, Xosé A. Sánchez Bugallo, e polo ministro de Sanidade, José Miñones, o número un dos socialistas galegos salientou que o PSdeG acude a estas eleccións decidido a defender todo o que leva feito neste mandato coa cabeza moi alta á fronte dos concellos e das concellerías.
O foco mediático neste inicio da campaña na cidade de Ourense, debido á singular rolda de prensa e apertura de investigación da Fiscalía contra Jácome, así como o xuízo rápido deste xoves contra Baltar por un posible delito contra a seguridade viaria. Ante esta conxuntura, Formoso remarcou que o PSdeG é “un partido con sentido común fronte a outros experimentos que vemos en Ourense”. Engadiu que “somos o antídoto contra o desgoberno”, algo que asegurou que “xa o vimos en Santiago” nas dúas anteriores lexislaturas antes da volta de Bugallo á alcaldía.
O líder do PSdeG reivindicou que encaran esta campaña co compromiso de “defender as ideas”, pero sempre tratando de facer “política útil”, que considera que “tanta falta fai hoxe en día nos concellos de Galicia”. Este modo de facer política entende que é o que levan facendo os últimos anos nas 6 grandes cidades galegas nas que gobernan ou cogobernan, así como no total dos 110 rexedores socialistas que son “referente da xestión municipal” en todo o Estado.
Para iso, teñen un programa marco que se lanzou dende a dirección galega, pero incide en que “cada candidatura ten que aportar as súas propostas para adaptalo ás necesidades dos seus veciños e veciñas”.
Formoso entende que os concellos do futuro teñen que seguir as liñas que eles establecen no documento que presentaron publicamente a semana pasada. Asegurou que durante os vindeiros catro anos se centrarán especialmente en crear “cidades máis amables, que creen emprego para reter o talento e que garantan o acceso á vivenda”, como así ben definido, recordou, na Ponencia Marco do PSdeG.
