A parlamentaria socialista criticou que o goberno galego “saque peito polos datos de 2024” cando a realidade amosa “recortes e privatizacións nos servizos públicos” como motor da súa suposta eficiencia
Espinosa aproveitou para instar ao Conselleiro de Facenda, Miguel Corgos, a acudir á próxima reunión co Ministerio de Facenda co “gorro de conselleiro de todos os galegos e galegas”, e non como voceiro do PP
A portavoz socialista na Comisión 3ª do Parlamento de Galicia, Elena Espinosa, advertiu hoxe que “o mantra de boa xestión do PP cae como un castelo de naipes” tras evidenciar que a débeda pública de Galicia se triplicou desde 2009, pasando de 3.923 millóns a 12.154 millóns de euros no terceiro trimestre de 2024, o que supón un aumento do 208%.
Durante a comparecencia de David Cabañó, secretario xeral Técnico e do Tesouro, Espinosa sinalou que, malia o leve descenso relativo da débeda galega en 2024, “non se pode illar da súa evolución histórica nin da comparación co conxunto do Estado”. Mentres a débeda estatal caeu ao 101,8% do PIB, Galicia mantén un nivel do 15%, pero cun crecemento acumulado moi superior ao doutras comunidades.
A parlamentaria socialista criticou que o goberno galego “saque peito polos datos de 2024” cando a realidade amosa “recortes e privatizacións nos servizos públicos” como motor da súa suposta eficiencia.
Espinosa aproveitou para instar ao Conselleiro de Facenda, Miguel Corgos, a acudir á próxima reunión co Ministerio de Facenda co “gorro de Conselleiro de todos os galegos e galegas”, e non como voceiro do PP. Pediulle que acepte a proposta de condonación da débeda por valor de máis de 4.000 millóns de euros, ofrecida polo Goberno de España.
“Perderon o debate na rúa. As súas escusas son propias de mal pagador. Esta é unha proposta de Estado, pensada para garantir a solvencia financeira das comunidades e reforzar os servizos públicos esenciais”, destacou.
A socialista lembrou que a proposta do Goberno central inclúe a todas as comunidades de réxime común, computando a condonación segundo o criterio de poboación axustada, o que beneficia especialmente a Galicia pola súa estrutura demográfica e dispersión territorial.
“Cataluña terá unha condonación do 20%, Galicia do 33%. Se é bo para Cataluña, é mellor para Galicia”, apuntou. “A comunidade que máis porcentaxe de débeda verá condonada é Canarias, gobernada polo PP. Non é un modelo feito á medida de ninguén”, salientou a deputada.
Espinosa lamentou que o PP galego “antepoña o seguidismo a Feijóo ao interese público” e subliñou que aceptar a condonación “é o primeiro paso para avanzar nun novo sistema de financiamento autonómico”.
“Condonar débeda tamén é financiamento. E en grandes cantidades”. Por iso, continuou, as e os socialistas de Galicia estamos onde hai que estar: defendendo unha medida que destaca a importancia da nosa comunidade e beneficia ao noso país”.
Nesto senso, e xa para concluir coa súa intervención, Elena Espinosa fixo un chamamento ao Goberno galego a “non cometer un erro histórico” e a dicir “si sen matices” á quita dos máis de 4.000 millóns de euros.