O portavoz de Sanidade do Grupo Socialista, Julio Torrado, criticou hoxe a proposición de reforma da Lei de Saúde presentada hoxe polo PP, que agocha, dixo, unha “deriva autoritaria” para “decretar un Estado de Alarma permanente, haxa ou non haxa pandemia”. Advertiu de que a norma altera os dereitos e liberdades a un nivel limitado ás leis orgánicas por atender a un “delirio bolivariano” do presidente da Xunta.

Torrado subliñou o “compromiso ético” do Grupo Socialista de “non estar de acordo con esta reforma” da que, dixo, “presumen en público, pero o que lles gusta en privado é unha Lei que restrinxe dereitos”. O responsable socialista interveu no debate de toma en consideración da reforma da Lei presentada hoxe no Parlamento polo PP, garantindo así “evitar os informes xurídicos” aos que estarían obrigados de ser a Xunta quen presentara o texto.

Criticou neste sentido que o presidente da Xunta se declarara “fulgurantemente en contra” de que o goberno central aplicara o Real Decreto de Estado de Alarma, pero que con esta manobra o eleva a Lei en Galicia que, ironizou, “está ben se o aplico eu”. Neste sentido, advertiu que o PP quere impoñer en Galicia unha posición que rexeitou nas votacións no Congreso.

O parlamentario socialista alertou ademais de problemas “de fondo” coa delimitación de autoridade sanitaria e a vacinación obrigatoria. En primeiro lugar, advirte que a norma “vai facer autoridade sanitaria o veciño do 5º” ao suprimir a delimitación de autoridade, co que “un inspector de Patrimonio pode aplicar unha sanción sen explicación a un cidadán calquera”.

Engadiu neste sentido que “non sabemos quen son, onde están nin quen contrata aos rastrexadores, pero poden sancionar a calquera cidadán pola rúa só porque eles o deciden” por unha Lei que mesmo conta con dous regulamentos sancionadores.

Incerteza científica

Torrado advertiu que a Lei, tal e como foi presentada polo PP, habilita que “calquera funcionario de calquera ámbito poida obrigar a vacinarse aínda que exista incerteza científica”, como sinala o texto literalmente no seu artigo 38, ter. Defendeu “a concienciación fronte á obrigatoriedade” da vacinación nun debate polo demais “lexítimo”, e advertiu que “en España non hai un problema de antivacinas” por canto “contamos cuns niveis de vacinación moi elevados”.

Sinalou que estes movementos “aliméntanse se facemos frontismo” e explicou que “o que hai é un problema socioeconómico de pobreza, e non sanitario, de persoas que non se vacinan por estar en núcleos ou entornos sociais de difícil acceso ao sistema”.