A portavoz de Emprego do Grupo Socialista, Carmen Rodríguez, vén de presentar unha batería de iniciativas parlamentarias para reclamarlle á Xunta que se implique na defensa das traballadoras e traballadores das tendas de H&M en Galicia, afectados polo ERE anunciado pola cadea, que afectaría a 65 persoas en toda Galicia.

Rodríguez reclámalle ao goberno galego que manteña unha xuntanza de urxencia cos representantes do persoal da empresa “co fin de amosarlles o seu apoio e establecer un plan de acción que evite os peches das tendas en Galicia, coa conseguinte perda de postos de traballo”. Os socialistas galegos apoian ás demandas dos sindicatos, que reclaman a negociación do ERE por territorios e a retirada dos despidos nos centros de traballo que non teñen perdas.

Sinala que, de acordo cos traballadores, entre as tendas afectadas en Galicia atópanse algunha das máis rendibles da marca en todo o territorio español, como é o caso de Ourense, que ten previsto o peche definitivo. Ademais da tenda de Ourense, a cadea quere pechar definitivamente a de Príncipe en Vigo e unha delas en Ferrol, mentres modifican as condicións de traballo en Lugo, Gran Vía de Vigo e Marineda en A Coruña.

Os socialistas galegos amosan o seu apoio ás tres centrais sindicais, que veñen de convocar unha serie de xornadas de folga fronte a unha medida que consideran absolutamente inxustificada, e que suporá unha “destrución de emprego absolutamente arbitraria, sen abordar caso por caso a situación económica, produtiva e organizativa”.