Insta a que os distritos forestais se vertebren para que realmente cumpran coas súas funcións de planificación, ordenación forestal e defensa do monte

A deputada socialista Carmen Rodríguez Dacosta incidiu hoxe na necesidade de acometer a curto prazo a redistribución dos distritos forestais co obxectivo de consolidar e mellorar a eficacia do dispositivo na loita contra os incendios forestais.

En concreto, demandou que o seu reparto se adecúe ao ditame do grupo de expertos da comisión parlamentaria que se constituíu a raíz da vaga de lumes do ano 2017. Malia que ese informe foi entregado ao Parlamento no verán de 2019, case tres anos despois segue a adiarse a implantación das principais medidas que recolle.

Tras lembrar que o Grupo Socialista apoiou ese ditame “por altura de miras”, Carmen Rodríguez Dacosta explicou que o voto a favor do PSdeG era tamén a un cambio de fórmulas de loita contra o lume. Pretendíase deste modo deixar atrás  unha política de “deixar facer” para acometer unha política “intervencionista”. Ese novo modelo reflectíase nas 123 medidas do ditame, “que eran os deberes do cambio para a Xunta”, pero que “non está sendo así porque moitas das melloras que se propoñían non foron implementadas nin asumidas polo goberno galego”.

Entre elas, unha das principais materias pendentes segue a ser o reparto axeitado de medios de loita existentes, xunto con reforzos axustados á incidencia dos lumes nas comarcas e distritos. “É”, evidenciou Carmen Rodríguez Dacosta, “unha reestruturación da que xa se falaba na época de Rosa Quintana” e na que non se avanzou nada.

Neste contexto, a deputada socialista lamentou que o goberno galego siga sen aclarar se vai acometer esta reestruturación para que a distribución e os medios cos que conte cada distrito se axuste verdadeiramente á incidencia dos lume. Así, reprochoulle ao director de Defensa do Monte que máis dun ano despois da súa toma de posesión siga sen tomar medidas.

“Pasaron os meses de planificación, pasou a campaña de incendios de 2021, comezaron xa a traballar os fixos discontinuos e, xa a mediados de marzo, non tan lonxe da campaña seguinte, non temos sequera coñecemento de se se iniciaron os primeiros trámites ao respecto, se a reestruturación se vai facer de acordo ao ditame ou se houbo xa algún tipo de contacto con sindicatos ou asociacións profesionais”, cuestionou Rodríguez Dacosta.

Ao mesmo tempo, a parlamentaria do PSdeG remarcou outras deficiencias nos medios de loita contra os incendios forestais.

Entre elas, mencionou a o descenso de efectivos. Carmen Rodríguez Dacosta explicou que o Pladiga recolle o número de prazas totais, pero non indica cantas están efectivamente cubertas. Isto dá lugar a “unha burbulla na que o papel o soporta todo, pero na realidade non hai vixilantes contratados e prestando servizo”. É unha situación, advertiu, que se repite na categoría de emisoristas, con moitas vacantes sen cubrir, o que provoca que se desprace a vixilantes fixos, deixando as casetas e torretas inoperativas.

Rodríguez Dacosta tamén sinalou a precariedade dos traballadores das brigadas, tanto a nivel formativo como en canto ás condicións para o desenvolvemento dos seus cometidos.

Por iso, reclamou que, “se de verdade lle queren facer un recoñecemento público ás brigadas municipais , ofrézanlles dunha vez un contrato laboral estable para traballos de prevención durante todo o ano”. Eses contratos, sinalou, serían “facilmente sufragables co diñeiro que se destinan a paliar os danos producidos no monte e que, de estar debidamente traballados, non serían necesarios na súa maior parte”.

A maiores, tamén fixo fincapé na distribución dos tractores en 4 dos 5 distritos forestais de Ourense, que en algúns casos quedaron sen funcionar por non ter quen o conducira e noutros funcionaron tan só pola boa vontade dos propios operarios.