Carlos López Font acusa á Xunta de deixar 470 millóns de euros sen executar en vivenda dende 2010, que permitirían construír 4.700 pisos
Reclama unha resposta urxente para os 18.000 solicitantes de vivenda pública en Galicia e urxe á Xunta a impulsar un Pacto pola Vivenda pública en Galicia
O portavoz de Vivenda e Infraestruturas do Grupo Socialista, Carlos López Font, criticou hoxe a “falta de ambición” do goberno galego en materia de vivenda pública. Na comparecencia da conselleira de Vivenda e Infraestruturas advertiu que o goberno galego deixou sen investir 7 de cada 10 euros para vivenda no ano 2022, e dende 2010 suman 470 millóns de euros gardados no caixón, o que permitiría construír 4.700 vivendas.
O responsable socialista responsabilizou ao goberno galego da parálise da construción de vivenda pública en Galicia, que pasou de 10.000 vivendas na Lexislatura que presidiu o socialista Pérez Touriño a apenas 600 na Lexislatura pasada. Reclamoulle unha resposta urxente aos 18.000 solicitantes de vivenda pública en Galicia.
Reclamoulle “lealdade” co goberno de España, que está a achegar os fondos para vivenda en Galicia, e que xunto coas partidas dos fondos europeos “foi practicamente a súa única política”. Pediu tamén “colaboración” cos concellos galegos, os únicos que están a impulsar a política de vivenda de Galicia diante do desleixo do goberno galego.
Instou ao goberno galego a “facer posible un gran Pacto” en materia de Vivenda pública ao que “todos estamos dispostos, pero que lles corresponde a vostedes como goberno logralo con medidas que axuden ao conxunto da sociedade”.
Reclamoulle ao goberno galego que delimite as áreas tensionadas e limite os prezos dos alugueiros, e lembrou que é o Executivo autonómico quen debe limitar os pisos turísticos en coordinación cos concellos. Pediulle que regule a vivenda turística por habitante “para evitar zonas especialmente tensionadas e desequilibrios na rehabilitación que produza ante a desertización invernal en núcleos de costa”.
O responsable socialista tamén lle pediu á conselleira un plan efectivo de rehabilitación de vivenda baleira, así como un mapa galego de vivendas inacabadas e axudas “cando menos do cento por cento para mellora da eficiencia enerxética”.
Infraestruturas
En materia de infraestruturas, afeoulle ao goberno galego o “incumprimento reiterado” do Plan Move anunciado en 2009, no que comprometían que o 80 por cento da poboación estivese a menos de dez minutos dunha vía de alta capacidade no ano 2015. Advertiu que “ano tras ano aparecen as mesmas infraestruturas orzamentadas, pero nada avanza”.
López Font enumerou os grandes atrasos e obras inacabadas do goberno galego provincia por provincia, comezando pola Vía Ártabra, a Autovía da Costa Morte, a variante de Carballo e o desdobramento do corredor Brión – Noia na Coruña. No caso de Lugo, lembrou o adiamento “eterno” na VAC Costa Norte, o acceso ao Porto Seco de Monforte, o Plan Paradai, a Rolda Leste de Lugo ou a conversión en autovía do corredor Nadela – Sarria.
No caso de Ourense, lembrou que a prolongación da AG – 31 entre Celanova e a fronteira portuguesa está “nun caixón” dende hai 15 anos. Algo semellante sucede no caso da provincia de Pontevedra, onde o PP mantén bloqueado o proxecto da VAC Tui – A Guarda, iniciado polo goberno presidido por Pérez Touriño, e a ampliación da autovía Santiago – A Estrada.
