lamenta o voto do PP contra a proposta socialista para suprimir as peaxes nas autoestradas autonómicas Carballo – A Coruña e Vigo – Baiona

O portavoz de Infraestruturas do Grupo Socialista, Carlos López Font, acusou hoxe ao presidente da Xunta e a todo o PP de “votar contra os galegos e galegas” que “merecen” a gratuidade das peaxes nas autoestradas autonómicas. Así logo de coñecer o rexeitamento por parte do PP da proposta que presentou no Pleno do Parlamento para pedir levantar as peaxes nas autoestradas Carballo – A Coruña e Vigo – Baiona, de titularidade autonómica.

O responsable socialista explicou que as áreas poboacionais da contorna de Vigo – Val Miñor e A Coruña – Bergantiños, afectadas por estas autoestradas, son “cuantitativamente moi importantes como para que a Xunta lles teña en consideración e aplique as bonificacións de forma inmediata”. López Font trasladou as peticións dos alcaldes e alcaldesas destes territorios, que advirten que a gratuidade das autoestradas son un estímulo económico fundamental”.

Criticou que o goberno galego se centre exclusivamente na AP – 9, de titularidade estatal, mentres obvia as autoestradas autonómicas, cun discurso “indignante” por parte do presidente da Xunta, que “lle pide aos demais pero se amosa escurridizo” cando se trata de responder das competencias propias.

Insistiu en que os socialistas galegos “apostamos tamén por chegar á meta da gratuidade nas autoestradas de peaxe titularidade da Xunta” ao igual que coa AP-9, e sinalou que as bonificacións aplicadas actualmente polo goberno galego na AG-55 e a AG-57 resultan “claramente insuficiente” e moito menor da que neste momento ten aplicado o Estado na AP-9.

Explicou que mentres o Estado bonifica o 50 por cento do total da viaxe de ida e volta, o goberno galego tan só desconta o 25 por cento da viaxe de volta nas súas autoestradas, que resulta “claramente insuficiente”.

Transporte público

López Font presentou tamén unha interpelación para reclamarlle á Xunta que atenda ao “tirón de orellas” que lle deu o Consello de Contas no seu último informe sobre a xestión do transporte público por estrada presentado no pasado outubro. O ente fiscalizador chegou a acusar á Xunta de “abdicar das súas competencias de inspección e control nos contratos asinados, desatender as queixas dos usuarios, deixar sen impoñer as multas nos procesos de infracción abertos e a falla de planificación.

O responsable socialista alerta de que a situación “inclusive empeorou”, a tenor das queixas dos usuarios “día a día”, polo que lle reclamou ao presidente da Xunta que “se poña a traballar” para garantir un servizo fundamental para milleiros de galegos e de galegas.

Lembrou que a situación desastrosa do transporte por estrada deriva dunha Lei de Modernización do Transporte Público aprobada en 2009 en contra da legalidade europea, e da prórroga de tódalas liñas en 2010. Como consecuencia, o Tribunal Supremo anulaba en 2016 aquelas prórrogas, que remataban en 2020, e o goberno galego presentaba unha Lei para actualizar o sistema público de transporte, dándose un prazo de 21 meses para elaborar o Plan de Transporte de Galicia.

Explica que con aquela decisión o goberno galego “se reservaba demasiado poder discrecional para introducir criterios políticos”, ademais de que o Plan non fora consensuado e non daba responsabilidade ás necesidades das galegas e galegos, sinaladamente no rural.