O secretario xeral do PSdeG solicítalle unha reunión a Rueda para tratar un problema que pon en risco as exportacións galegas aos Estados Unidos, “que medraron máis dun 40 % nos últimos anos e xa se sitúan por enriba dos 800 millóns de euros ao ano”
“Non facer nada non é unha solución”, advirte o líder socialista, que invita a fuxir de “posicións ambiguas” ante as turbulencias xeopolíticas
O secretario xeral do PSdeG, José Ramón Gómez Besteiro invitou a promover o consumo de proximidade como medio para paliar os efectos da crise que está a crear o presidente dos Estados Unidos ao dar a orde de gravar os produtos procedentes de outros países. “Fronte aos aranceis de Trump, compra local”, invitou o líder socialsita ante o “momento de turbulencias xeopolíticas” que enfronta o mundo.
Durante a súa visita á escola infantil muncipal A Caracola, na Coruña, que aproveitou para poñer en valor os alimentos de proximidade e o labor dos produtores locais, Besteiro tamén quixo salientar que o Goberno central activou de xeito inmediato un paquete de medidas urxentes complementarias ás que porá en marcha Europa para atallar os efectos das políticas trumpistas.
Pola contra, dixo non compartir “as posicións ambiguas” das mensaxes sobre a escasa repercusión das medidas da Administración norteamericana sobre a economía galega. “A realidade é que se pode frear o crecemento de moitas das nosas empresas, xa que as exportacións aos Estados Unidos medraron máis dun 40 % nos últimos anos e xa se sitúan por enriba dos 800 millóns de euros ao ano, así que non facer nada non é unha solución”, advertiu.
Por ese motivo, anunciou que hoxe mesmo vai pedir unha reunión urxente co presidente da Xunta, co fin de abordar a situación. “Hai que adoptar medidas xa, porque creo que o momento que vivimos require de disposición, de cooperación e de colaboración a todos os niveis”, explicou.