O líder do PSdeG asiste en Marín ao acto institucional en memoria das vítimas e salienta a “confianza de que se faga xustiza neste ano 25” co remate do xuízo

O secretario xeral do PSdeG, José Ramón Gómez Besteiro, trasladou hoxe o apoio do socialismo galego ás familias das vítimas do naufraxio do Vila de Pitanxo “e a toda a familia do mar”. Besteiro asistiu ao acto institucional organizado en Marín con motivo do terceiro aniversario do accidente, no que tamén participou o delegado do Goberno, Pedro Blanco.

O responsable socialista sinalou a “esperanza de que neste ano remate o xuízo e non teñamos que agardar ao ano que vén para que se faga xustiza”. Besteiro participou no acto para respaldar o esforzo das familias por acadar xustiza e dignidade e acompañalos “ata que se esclarezan os feitos e se depuren responsabilidades”, e reivindicar que o mar sexa un “espazo de seguridade e respecto” para os milleiros de persoas que traballan e viven del.

O líder do PSdeG salientou que o mar forma parte da identidade e do modo de vida de Galicia, e polo tanto debe ser “un lugar seguro para todos os que traballan nel, con condicións dignas e con tódalas garantías que merecen”. Puntualizou finalmente que as familias das vítimas do Vila de Pitanxo “sempre nos terán ao seu lado, porque a súa dor e a súa demanda de xustiza tamén son as nosas”.