“Creo na importancia de traballar sempre con sentido de país”, sinala Besteiro, quen reitera a disposición do PSdeG a manter un diálogo construtivo co Executivo galego. “Confiamos en que poidamos atopar puntos de encontro en beneficio de todas as galegas e todos os galegos”, engade

O secretario xeral do PSdeG, José Ramón Gómez Besteiro, dirixiuse este venres por carta ao presidente da Xunta, Alfonso Rueda, para solicitarlle unha reunión urxente co obxectivo de analizar o impacto que o novo contexto internacional pode ter sobre Galicia e acordar unha resposta conxunta.

Na misiva, Besteiro expresa a súa preocupación polas consecuencias económicas e sociais que poden derivarse dos recentes movementos internacionais, especialmente das novas políticas arancelarias anunciadas polos Estados Unidos, que ameazan con frear a internacionalización das empresas galegas e comprometer os avances dos últimos anos.

O líder socialista salienta tamén as oportunidades que se abren para Galicia no marco dos acordos de Mercosur e os investimentos europeos en materia de defensa, e defende que o Goberno galego debe actuar con “unha estratexia clara e firme”.

“Creo na importancia de traballar sempre con sentido de país”, sinala Besteiro, quen reitera a disposición do PSdeG a manter un diálogo construtivo co Executivo galego. “Confiamos en que poidamos atopar puntos de encontro en beneficio de todas as galegas e todos os galegos”, engade.

O secretario xeral socialista amosa a súa vontade de celebrar o encontro “no menor tempo posible” e queda á espera da resposta de Rueda para concretar a data e o formato da reunión.