Lara Méndez aféalle ao presidente da Xunta que sexa “incapaz” de manter cos alcaldes e alcaldesas a mesma relación que lle esixe ao goberno central

O portavoz do Grupo Socialista, José Ramón Gómez Besteiro, preguntaralle ao presidente da Xunta pola sobrecarga aos concellos de competencias propias do goberno galego sen incluír o financiamento necesario. Así o anunciou a viceportavoz do Grupo Socialista, Lara Méndez, logo da Xunta de Portavoces do Parlamento que fixou a orde do día do Pleno da próxima semana.

A responsable socialista advertiu que a deriva do goberno galego de descargar as súas propias competencias nos concellos está a amosar a mala xestión dunha administración incapaz de establecer unhas relacións institucionais “cordiais”, baseada no diálogo e a comunicación. Moi ao contrario, ironizou, “en calquera momento espertamos con outra ocorrencia da Xunta e lles traslada aos concellos as competencias sobre os centros de saúde”.

Explicou que os socialistas presentarán unha pregunta oral sobre a situación da asistencia pediátrica no Barco de Valdeorras a modo de exemplo do que está a suceder en toda Galicia como consecuencia da nefasta xestión da sanidade por parte do goberno galego. Criticou o “desleixo e abandono de funcións” por parte da Xunta, que está a poñer en risco este piar do Benestar pola súa falla de planificación, de xestión e de recursos.

Criticou que mentres tanto o conselleiro responda en “ton xocoso” para agochar o peche de centros de saúde no verán co eufemismo da “reorganización”, que vai ser nefasta para as persoas maiores que teñan que buscar desprazamento ou aqueles con grandes afeccións que terán que pospoñer a diagnose.

O mesmo sucede co resto dos piares do benestar, como a educación o a atención á dependencia, polo que o Grupo Socialista presentará unha interpelación sobre o modelo de apoio aos gastos escolares e unha proposición non de Lei para reclamarlle á Xunta que poña en marcha medidas para axilizar o sistema de valoración da dependencia.

Tamén levarán unha proposición non de Lei para pedirlle á Xunta que pare coa nova suba do canon de Sogama coa que pretenden “cargarlle aos concellos” e aos veciños un incremento que deriva da súa mala xestión dos residuos sólidos urbanos. Finalmente, presentarán unha pregunta oral para pedirlle axuda ao goberno galego para garantir a prestación dos servizos de vixilancia e rescate nos espazos acuáticos e unha moción sobre a xestión do transporte público por estrada.