Os socialistas reivindican o seu traballo en máis de 100 concellos e defenden a súa contribución ao benestar da cidadanía

Os alcaldes e as alcaldesas denunciaron a clara “discriminación” na distribución de fondos e axudas da Xunta, que beneficia de forma desproporcionada aos municipios gobernados polo PP

Besteiro lembrou que comezou en política nun concello, destacando a importancia do contacto directo coas veciñas e veciños “e os problemas cotidiás e reais”

“Mobilizamos ao poder local de Galicia, aos nosos alcaldes e alcaldesas, para reivindicar un novo financiamento local”, sinalou o secretario xeral do PSdeG

Os alcaldes e alcaldesas do PSdeG reuníronse hoxe nunha xornada de traballo presidida polo secretario xeral, José Ramón Gómez Besteiro, para coordinar esforzos e fortalecer o municipalismo en Galicia. Neste encontro, os socialistas manifestaron a súa vontade de seguir liderando unha Galicia máis xusta, equitativa e eficiente desde o ámbito municipal, fronte ao “abandono e a ineficiencia” do Goberno autonómico liderado por Alfonso Rueda.

Na súa intervención central, o secretario xeral do PSdeG, José Ramón Gómez Besteiro, sinalou que pese aos atrancos da dereita, “o PSdeG seguirá a traballar coa firmeza e determinación que demanda o momento”. Besteiro destacou tamén que, a pesar do difícil clima de polarización política a nivel estatal, os concellos socialistas son e seguirán sendo un bastión fundamental para o partido en Galicia: “Os alcaldes e as agrupacións locais son a nosa maior fortaleza, somos o partido  com maior capacidade de influencia”, afirmou.

Besteiro recordou que el mesmo comezou en política nun concello, e subliñou que esta é a Administración máis enriquecedora, xa que é a que se relaciona de forma máis directa cos veciños e veciñas, ocupándose das preocupacións reais como a economía familiar. “A cesta da compra ou a suba do recibo do lixo son cuestións que afectan á poboación, non os debates teatrillo destinados a facer ruído e nada máis”, sinalou. Lembrou ademais que os socialistas gobernan máis de 100 concellos en Galicia, representando politicamente a máis da metade da poboación galega.

Durante a xornada, púxose de manifesto a necesidade urxente de confrontar as políticas da Xunta de Galicia e dun presidente “conformista”: “Rueda lidera un Goberno que deixa facer, pero non transforma, que vende como grandes logros o que en realidade son simples trámites”.

Neste sentido, os alcaldes e alcaldesas coincidiron en denunciar que a xestión do PP está centrada en confrontar con Pedro Sánchez “en lugar de resolver os problemas dos galegos e das galegas”, e acusaron a Rueda de actuar como “soldado de Feijóo”, servindo a intereses partidistas en lugar de traballar por Galicia.

Un dos temas centrais do encontro celebrado en Santiago foi a denuncia da distribución inxusta de competencias entre a Xunta e os concellos. “Rueda especializouse en transferir responsabilidades aos municipios sen o financiamento adecuado, deixando que sexan os concellos quen cargue cos custos mentres el se atribúe os logros”, criticaron os líderes municipais. Púxose como exemplo o Servizo de Axuda no Fogar, onde a Xunta apenas achega 5 euros por hora dun custo real de 21 euros, o que pon en perigo a viabilidade deste servizo esencial para moitas familias.

Outro tema candente foi a recente subida do recibo do lixo debido á xestión de SOGAMA, onde os alcaldes socialistas denunciaron que a Xunta “é quen queda co 100% do imposto e non fixo nada por cambiar un método insostible polo que a UE penaliza a Galicia”. Reclamaron con firmeza que, se Rueda realmente quixese aliviar a carga dos cidadáns, bonificaría o 100% do incremento do recibido do lixo, e non só o 60% como anunciou de forma “tramposa”. Nesta liña, coordinaranse a nivel local diferentes accións de protesta.

En relación co financiamento municipal, denunciaron unha clara “discriminación” na distribución de fondos e axudas, que beneficia de forma desproporcionada aos municipios gobernados polo PP.

José Ramón Gómez Besteiro deixou claro que “o PSdeG non só se defíne pola crítica, senón polo orgullo do que facemos e do que logramos nos máis de 100 concellos que gobernamos en Galicia”, e sinalou que a política útil, sensata e con visión de goberno é a marca que seguirán consolidando.

En declaracións aos medios, o secretario xeral subliñou a importancia do encontro, “xa que mobilizamos ao poder local de Galicia, ás alcaldesas e aos alcaldes, para reivindicar  un novo financiamento local, e para reclamar á Xunta  que deixe de afogar aos concellos con máis cargas e sen recursos económicos adicionais”.

O foro concluíu co compromiso de convocarse de maneira periódica para avaliar a situación e seguir reclamando solucións aos problemas que enfrontan os municipios galegos. Ademais, anunciouse a creación de mesas de traballo que reforzarán a coordinación dentro do partido, así como o lanzamento dun ciclo de diálogos e actividades nas provincias galegas, comezando en Celanova e Vigo nos próximos días.

Coa vontade de unificar esforzos e alzar a voz fronte ao “menosprezo constante” da Xunta cara aos concellos, os socialistas galegos reafirmáronse como unha forza decisiva para o futuro de Galicia, comprometidos cunha Galicia mellor para todos os seus cidadáns.