Sobre os contratos a dedo investigados no Parlamento, o líder socialista afirmou que “non son un caso illado, son parte dun sistema organizado que utilizou os recursos públicos para beneficiar aos próximos ao PP, mentres os servizos esenciais para a cidadanía quedaban relegados”

“Se o PP quere tapar a verdade, acudiremos onde faga falta para garantir a transparencia, onde faga falta”

O secretario xeral do PSdeG e voceiro do Grupo Parlamentario Socialista, José Ramón Gómez Besteiro, acompañado pola alcaldesa de Lugo, Paula Alvarellos, e a deputada Lara Méndez e outros cargos do partido, anunciou hoxe que o PSdeG presentou unha emenda aos orzamentos de 2025 da Xunta para garantir unha partida específica destinada á rehabilitación do Cuartel de San Fernando para a creación do Museo da Romanización de Lugo, longamente prometido.

Besteiro denunciou a ausencia de investimento para este proxecto nos orzamentos do goberno de Alfonso Rueda e lamentou o desleixo do Partido Popular co patrimonio cultural galego.

Unha débeda histórica con Lugo e Galicia

Neste senso, a alcaldesa da cidade, Paula Alvarellos, destacou a importancia do Museo da Romanización como un proxecto clave para a conservación, estudo e divulgación do legado romano en Galicia. “Lugo é o epicentro do patrimonio romano do noroeste peninsular, e a súa riqueza histórica merece ser recoñecida e posta en valor. Falamos de máis de 15.000 pezas romanas que agora permanecen dispersas e sen o espazo adecuado para o seu coidado. A Xunta leva 13 anos incumprindo as súas promesas coa nosa cidade”, denunciou.

A alcaldesa puxo en valor o compromiso do goberno local, que adquiriu o Cuartel de San Fernando para avanzar neste proxecto, e criticou duramente á Xunta por non incluír ningunha partida para o museo nos orzamentos de 2025 e agradeceu a implicación do Grupo Parlamentario Socialista.

José Ramón Gómez Besteiro confirmou a presentación dunha emenda específica aos orzamentos da Xunta para destinar partidas plurianuais que permitan iniciar a rehabilitación do Cuartel de San Fernando. “A ausencia de financiamento para este proxecto nos orzamentos demostra o abandono e desprezo do Partido Popular polo patrimonio romano máis importante de Galicia. O PSdeG non permitirá que Lugo siga marxinada por unha Xunta que lle dá as costas á nosa historia”, asegurou.

Ao encontro ás portas do cuartel asistiu unha ampla representación de Mvro, a plataforma cidadá en defensa do Museo da Romanización, que aglutina a 150 colectivos sociais, culturais e do ámbito económico da cidade.

O sobrecuste no Álvaro Cunqueiro: a marca da corrupción do PP

Besteiro tamén abordou o escándalo do sobrecuste de 470 millóns de euros no Hospital Álvaro Cunqueiro de Vigo, denunciando que representa “unha das maiores mostras da nefasta xestión do Partido Popular”, así como os numerosos contratos a dedo a familiares e amigos de altos cargos do PP”, entre eles, Feijóo, Rueda e Paula Prado. O líder sinalou que “estes contratos a dedo non son un caso illado, son parte dun sistema organizado que utilizou os recursos públicos para beneficiar aos próximos ao PP, mentres os servizos esenciais para a cidadanía quedaban relegados”, afirmou.

Como exemplo deste despilfarro, Besteiro destacou que o sobrecuste no Álvaro Cunqueiro equivale a grandes investimentos que Galicia precisa, como a electrificación da liña ferroviaria Lugo-Ourense. “O PP utiliza os cartos de todos os galegos e galegas para encher os petos dunha minoría, e iso é inaceptable. Esiximos respostas claras e responsabilidades políticas por este saqueo sistemático”, engadiu.

O secretario xeral do PSdeG foi especialmente contundente ao abordar a Comisión de Investigación aberta no Parlamento Galego. “O Partido Popular pretende converter esta Comisión nun paripé, cun único obxectivo: tapar a verdade. Non imos consentir que a maioría parlamentaria do PP sexa un obstáculo para esclarecer un escándalo que afecta ao diñeiro de todos os galegos e galegas”, declarou.

Tamén quixo deixar claro que os socialistas utilizarán todos os mecanismos á súa disposición para garantir a transparencia. “Se a Comisión non serve para que a verdade saia á luz, levaremos este caso á Fiscalía. Non descartamos ningunha medida para que se depuren responsabilidades políticas e xudiciais”, advertiu.

O líder socialista cargou tamén contra o actual presidente da Xunta, Alfonso Rueda, recordando que foi parte do goberno de Feijóo durante 15 anos. “Rueda non pode fuxir das súas responsabilidades. Os sobrecustes e os contratos a dedo non son anomalías, son a marca de gobernar do PP, e a cidadanía merece saber toda a verdade”, concluíu.